हामी सबैकाे संसारन्यूज

८ जेठ, काठमाडौं । सरकारले सडकमा निस्केर हिड्न कडाई गर्न लागेको छ । गृह मन्त्रालयले निषेधाज्ञा उल्लंघन गरेर सडकमा निस्कन नदिन सुरक्षा निकाय र स्थानीय प्रशासनहरुलाई निर्देशन दिएको छ ।

गृह सचिव महेश्वर न्यौपानेले नेपाल प्रहरी, सशस्त्र प्रहरी र राष्ट्रिय अनुसन्धान विभागका प्रमुखहरुलाई डाकेर निषेधाज्ञाका बेला भिडभाडजन्य गतिविधि गर्न नदिन निर्देशन दिएका हुन् ।

सरकारी आदेश उल्लंघन गरेर सडकमा निस्किए कानुनअनुसार कारबाही गर्नसमेत गृहले निर्देशन दिएको छ ।

शुक्रबार राष्ट्रपति विद्यादेवी भण्डारीबाट भएको प्रतितिधि सभा विघटनको विरुद्धमा विपक्षी गठबन्धनले सडक र अदालत दुबै मोर्चाको लडाइँ लड्ने सामूहिक निर्णय गरेसँगै गृहले निषेधाज्ञामा कडाइ गर्न लागेको हो ।

सरकार विपक्षीको प्रतिकार गर्न कोभिड १९ संकटकाल व्यवस्थापन सम्बन्धी अध्यादेश लागू गर्ने तयारीमा रहेको स्रोतले जनाएको छ । विहिबार मात्र राष्ट्रपति विद्यादेवी भण्डारीले कोभिड १९ संकटकाल व्यवस्थापन सम्बन्धी अध्यादेश जारी गरेकी थिइन् ।

उक्त अध्यादेश लागू भएको खण्डमा कुनै पनि काम गर्न बाधा अवरोध सिर्जन गरेमा एक वर्ष कैद वा पाँच लाख रुपैयाँसम्म जरिवाना वा दुवै सजाय हुने व्यवस्था छ ।

अध्यादेशको मापदण्डको पालना नगरे ६ महिनासम्म कैद वा तीन लाख रुपैयाँसम्म जरिवाना वा दुवै सजाय हुन सक्ने व्यवस्था गरिएको छ ।