हामी सबैकाे संसारन्यूज

जेठ ११, काठमाडौं । प्रमुख प्रतिपक्षी दल नेपाली कांग्रेसले कोरोना महामारीको आडमा प्रधानमन्त्री केपी शर्मा ओलीे सत्ता लम्ब्याउने खेलमा लागेको आरोप लगाएको छ । बुधबार पार्टी सभापति शेरबहादुर देउवा निवास बुढानीलकण्ठमा बसेको बैठकले ओली कोरोना आतंक फैलाउँदै सत्ता टिकाउने खेलमा लागेको आरोप लगाएको हो ।

कोरोना नियन्त्रणतर्फ सरकारले कुनै ध्यान नदिएको कांग्रेसको निष्कर्ष छ । बैठकपछि कांग्रेसका महामन्त्री डा. प्रकाशशरण महतले भने, ‘अस्पतालमा अक्सिजनको सुनिश्चितता, बेडको सुनिश्चितता र दुर्गममा पीसीआर परीक्षण गरेर कोरोना नियन्त्रणतर्फ ध्यान दिएको छैन । सरकारले संक्रमणको आडमा जनतालाई आतंक फैलाएर स्वार्थसिद्धि गर्ने काम गरेको छ ।’

बैठकले प्रतिनिधिसभा विघटन गर्ने सरकार र राष्ट्रपतिको कदमविरुद्व कानूनी र राजनीतिक लडाईँलाई निरन्तर अगाडि बढाउने निर्णय पनि गरेको छ ।

यसैबीच बैठकले ओली सरकारविरुद्व बनेको विपक्षी दलहरुसँगको सहकार्यलाई तल्लो तहसम्मै विस्तार गर्ने निर्णय पनि गरेको छ । बैठकले आफ्ना भातृ संगठन र तल्लो तहका कमिटीलाई पनि विपक्षी दलसँग सहकार्य गरेर अघि बढ्न निर्देशन दिने निर्णय गरेको हो ।

‘जिल्लादेखि वडा तहसम्मका पार्टी संरचनालाई क्रियाशिल बनाउँदै ओली सरकारविरुद्व सशक्त जनमत बनाउने विषयमा बैठकमा छलफल भएको छ’, महतले भनेका छन्, ‘सरकारविरुद्वका गतिविधि गर्न विपक्षी दलहरुबीच अझ राम्रोसँग समन्वय गर्ने निर्णय भएको छ ।’