हामी सबैकाे संसारन्यूज

काठमाडौं । नाडा अटोमोवाइल्स एशोसिएशन अफ नेपाल (नाडा) को आयोजनामा आगामी भदौमा ‘नाडा अटो शो २०२६’ हुने भएको छ । नेपालकै सबैभन्दा भव्य र प्रतिष्ठित यो अटोमोबाइल प्रदर्शनीको १८औं संस्करण आगामी भदौ ९ गतेदेखि १४ गतेसम्म आयोजना हुन लागेको हो ।

प्रदर्शनीका लागि यहि जेठ १८ गतेदेखि २६ गतेसम्मका लागि स्टल बुकिङ खुल्ला गरिएको नाडाले जनाएको छ । ६ दिनसम्म चल्ने यस भव्य मेलामा विभिन्न ब्रान्डका सवारी साधन, पार्टपुर्जा, वित्तीय सेवा (अटो लोन) एवं अन्य सम्बन्धित सरोकारवाला संघ–संस्थाहरूको सहभागिता रहने जनाइएको छ ।

नाडा अटो शोले नेपालका अटोमोबाइल उत्पादक, आयातकर्ता, वितरक, सेवा प्रदायक तथा सम्बन्धित उद्योगहरूलाई आफ्ना नवीनतम उत्पादन, अत्याधुनिक प्रविधि र सेवाहरू ग्राहकमाझ प्रदर्शन गर्ने उत्कृष्ट अवसर प्रदान गर्दै आएको छ । यस वर्षको प्रदर्शनीमा पनि हजारौं आगन्तुक, उद्योग व्यवसायी, लगानीकर्ता तथा सञ्चारकर्मीहरूको ठूलो सहभागिता रहने अपेक्षा गरिएको छ ।

स्टल बुकिङ सम्बन्धी विस्तृत जानकारी, आवेदन प्रक्रिया, शुल्क तथा अन्य आवश्यक विवरणहरू व्यवस्थापक कम्पनी ग्लोबल एक्स्पोजिसनबाट प्राप्त गर्न सकिने नाडाले उल्लेख गरेको छ । आयोजकले इच्छुक सम्पूर्ण सहभागी संस्थाहरूलाई समयमै आफ्नो स्टल बुकिङ सुनिश्चित गरी यस प्रतिष्ठित प्रदर्शनीको हिस्सा बन्न हार्दिक अनुरोध समेत गरेको छ ।