हामी सबैकाे संसारन्यूज

अलख निरन्जन लोहार
टीकापुर , कैलाली हाल : भारत

आमा प्राण समानकी ढुकढुकी आमा तिमी त्राण हौ,
आमा हौ जहिल्यै खुला हृदयकी आमा तिमी सार हौ,
आमा सत् मृदु चेतपूर्ण छ हियो निर्माणकी मूल हौ,
भर्छौ दिव्य कला हरेक पलमा उद्घारकर्ता भयौ ।१।

आमा सिर्जनको नवीन सविता सम्मान आराधना,
मेरो ध्यान विचार हौ मगज हौ नौलो नयाँ कल्पना,
आमा हौ कविको सुरम्य कविता आमा तिमी छ्न्द हौ,
मेरो माथ बहार भै कलममा सौन्दर्य आनन्द हौ ।२।

तिम्रो काख बसेर भुल्छु ननिका बिर्सन्छु सारा पिर,
लेखौला कविता समस्त पदमा राखेर मेरो शिर,
आमा ईश्वर हौ अनन्त जगकी आमा तिमी इश्वर ,
आफ्ना सन्ततिको खुशी रहरमा तोड्छौ सबै जञ्जिर ।३।

सारा भोक सही कसेर पटुकी सन्तानलाई दियौ,
पीडा भोक भुलेर आर्त्त नबनी सङ्घर्ष सारा गर्‍यौ,
आफ्नो ज्यान सकेर जीवन दिने आमा तिमी भैरवी,
देवीको पथ पुज्न खोज्छु तब ता सम्झिन्छु तिम्रो छवि ।४।

मै हाँसू हरबारमा चहकिलो त्यो देह हाँस्यो भने,
मै बाँचू हर सार भित्र जननी मै भित्र बाँच्यो भने,
ठूलो हिम्मत साथ हिँड्छु सहजै विश्वास मानीकन,
आशीर्वाद सदा सदा मिलिरहोस् खुल्ला बनाई मन ।५।

छन्द : शार्दूलविक्रीडित
गण : म – स – ज – स – त – त – गु
सङ्केत : SSS – IIS – ISI – IIS – SSI – SSI – S