हामी सबैकाे संसारन्यूज

भक्तपुर । नेपाल सरकारले प्रारम्भिक बालविकासका सहजकर्ता, विद्यालय सहायक कर्मचारी, विद्यालय सहयोगी तथा संघीय शिक्षण सहयोग अनुदान कोटामा कार्यरत शिक्षकहरूको पारिश्रमिक तथा तलब वृद्धि गर्ने निर्णय गर्दै कार्यान्वयनको लागि स्थानीय तहहरुलाई पत्राचार गरिएको छ ।

शिक्षा विभाग, सानोठिमीले भदौ ८ गते सबै स्थानीय तहलाई पत्र पठाउँदै मन्त्रिपरिषद्को भदौ ३ गतेको निर्णय कार्यान्वयन गर्न अनुरोध गरेको हो।

निर्णयअनुसार प्रारम्भिक बालविकासका सहजकर्ता, विद्यालय सहायक कर्मचारी र विद्यालय सहयोगीले संघीय सरकारले हाल उपलब्ध गराउँदै आएको पारिश्रमिक अनुदानमा मासिक ५ हजार रुपैयाँ थप पाउनेछन्। थप रकमसहितको पारिश्रमिक निकासा गर्न विभागले स्थानीय तहलाई निर्देशन दिएको छ।

त्यस्तै, कक्षा ९–१० मा संघीय शिक्षण सहयोग अनुदान कोटामा कार्यरत शिक्षकहरूको तलब माध्यमिक तह तृतीय श्रेणीको सुरु तलब बराबर कायम गरिने भएको छ। कक्षा ६–८ मा कार्यरत शिक्षकहरूको तलब भने निम्न माध्यमिक तह तृतीय श्रेणीको सुरु तलब बराबर हुने गरी निकासा गर्न भनिएको छ।

शिक्षा विभागले मन्त्रालयको निर्णय कार्यान्वयनका लागि सबै स्थानीय तहलाई आवश्यक प्रक्रिया अघि बढाउन अनुरोध गरेको छ। साथै, ७७ वटै शिक्षा विकास तथा समन्वय एकाइलाई स्थानीय तहसँग आवश्यक समन्वय गर्न निर्देशन दिइएको छ।

विभागका निर्देशक निलकण्ठ ढकालद्वारा हस्ताक्षरित पत्रमा उक्त निर्णय तत्काल कार्यान्वयनका लागि पठाइएको उल्लेख छ।