Sansar News
डा. ठाकुर माेहन श्रेष्ठ,काठमाडौँ
झुटो आरोप नलगाऊनु हतारमा
पत्याउनेको कमी छैन याे बजारमा
जनदरबारमा बोलेँ, दोष देखेर
प्रथा बन्दै छ मौन व्रत सरकारमा
मान्छे–मान्छेमा आज हराउँदै विश्वास
भासिँदै छन् साना देश द्वन्दको मारमा
अनुहारमा घाउ बोकेर हाँसेका छन्
झुट र भ्रष्ट नै छाएका छन् प्रचारमा
सहर गाउँमा बढेका छन् वृद्धाश्रम
वृद्धाका सेवा सम्मान् घटे परिवारमा
मीठो हुन्न जल, सागरमा मह घोल्दा
अमृत खोज्दैमा भौँतारियौँ निहारमा
बिलाएर जान्छ झूटाे अँध्यारोमा आफैँ
थप्दैमा त्रास सत्य हार्दैन संसारमा।
अक्षर : १४
अनुप्रास : आर
शेष अनुप्रास : मा
वि.सं.२०८३ असार २७ शनिवार ०५:०९ मा प्रकाशित
