हामी सबैकाे संसारन्यूज

काठमाडौं ।  जेन्जी अभियन्ता रक्षा वमले गणेशको आत्मदाह घटनापछि सामाजिक सञ्जालमार्फत भावुक प्रतिक्रिया व्यक्त गर्दै राज्यका निकाय र विशेषगरी काठमाडौं महानगरपालिकाको कार्यशैलीप्रति कडा असन्तुष्टि जनाएकी छन्।

उनले आफ्नो स्टाटसमा गणेशको आत्मदाह कुनै एक दिनको घटना नभई गरिब, सडक व्यापारी र सुकुम्बासीमाथि लामो समयदेखि हुँदै आएको व्यवहारको परिणाम भएको दाबी गरेकी छन्। वमले काठमाडौं महानगरका मेयर बालेन्द्र (बालेन) शाहको नेतृत्वमा महानगर प्रहरीमा अमानवीय र असंवेदनशील कार्यशैली संस्थागत भएको आरोप लगाएकी छन्।

उनको भनाइ अनुसार, चुनावअघि सडक व्यापारी व्यवस्थापन गर्ने प्रतिबद्धता जनाएका बालेन शाह महानगरको नेतृत्वमा पुगेपछि गरिबमुखी नीति अपनाउन नसकेको आरोप लगाएकी छन्। उनले सडक व्यापारी, सुकुम्बासी तथा श्रमिक वर्गप्रति भएको व्यवहारले समाजमा असन्तोष बढाएको उल्लेख गरेकी छन्।

वमले कर्णालीमा सडक किनारमा व्यापार गर्ने महिला, अटो व्यवसायी तथा अन्य गरिब नागरिकमाथि भएका घटनालाई पनि उदाहरणका रूपमा उल्लेख गर्दै यस्ता घटनाले राज्यप्रतिको विश्वास कमजोर बनाएको दाबी गरेकी छन्।

स्टाटसमा उनले गणेशको मृत्युपछि घटनाको मूल कारणभन्दा अन्य विषयमा बहस मोड्ने प्रयास हुन सक्ने आशंका व्यक्त गर्दै घटनाको निष्पक्ष छानबिन र जिम्मेवारी निर्धारणको माग गरेकी छन्।

स्टाटसको अन्त्यमा उनले लेखेकी छन्:  “अलविदा गणेश। धेरै सतायो यो राज्यले। अब आराम गर।”