हामी सबैकाे संसारन्यूज

विदुर अधिकारी,रामपुर, चितवन

जन्म्यौ भानु असार मास दिनको, उन्तीस जाँदा दिन
जन्मेको स्थल त्यो थियो तनहुँको,रम्घा चुँदी माझमा
हौ सच्चा अनुवाद गर्न सहजै,सक्ने तिमी साधक
त्यो रामायण फेरि लेख्नु छ अझै,हे भानु आऊ अब।
(१)
बाजे कृष्ण थिए धनञ्जय पिता,धर्मावती मातृका
सानैमा कविता सिलोक लयमा,भन्थ्यौ अरे सर्वदा
घाँसीबाट सिकेर पाठ गुनिलो,बन्दै गयौ साधक
त्यो रामायण फेरि लेख्नु छ अझै,हे भानु आऊ अब।
(२)
बाजेबाट सुनेर शास्त्र महिमा,बन्दै गयौ शिक्षित
लेख्यौ राम कथा अहा!सुरसिलो,उल्था गरी संस्कृत
नेपालीपनको उजागर गरी,भाषा मिलायौ सब
त्यो रामायण फेरि लेख्नु छ अझै,हे भानु आऊ अब।
(३)
ती प्रश्नोत्तर आदि पुस्तकहरू,लेख्यौ नि रामायण
साँचो जीवनका व्यथा अनि कथा,लेख्यौ नियालीकन
सारा यी घरबार वर्णन गरी,साँचो बतायौ सब
त्यो रामायण फेरि लेख्नु छ अझै,हे भानु आऊ अब।
(४)
मोतीराम भएर माध्यम सबै,छापे जसै सिर्जना
तिम्रो कीर्ति समस्त फैलिन गयो,बढ्दै गयो तिर्सना
हाम्रा राष्ट्रविभूति, आदिकवि हौ,सम्मानका लायक
त्यो रामायण फेरि लेख्नु छ अझै,हे भानु आऊ अब
(५)

छन्द : शार्दूलविक्रीडित
गण : म – स – ज – स – त – त – गु
सङ्केत : SSS – IIS – ISI – IIS – SSI – SSI – S