हामी सबैकाे संसारन्यूज

१६ जेठ, काठमाडौं । एकीकृत अखिल नेपाल शिक्षक संगठनले सरकारद्वारा शनिबार ल्याएको बजेटमा शिक्षामा बजेट घटाइएको भन्दै आपत्ति जनाएको छ ।

अध्यक्ष शंकर अधिकार र महासचिव निमबहादुर केसीद्वारा जारी प्रेस विज्ञप्तिमा विगतको वर्षको तुलनामा शिक्षामा बजेट घटाइएकोमा आपत्ति जनाउँदै सरोकारवाला सबैको ध्यानाकर्षण गरिएको छ ।

शिक्षक तथा विद्यालय कर्मचारीमाथि विभेद गरी विगतमा शिक्षा मन्त्रालय र नेपाल शिक्षक महासंघ विच सहमति भए बमोजिमको कार्यक्रम र योजना बजेटमा नल्याएको आरोप लगाइएको छ ।

स्थानीय तहको साझेदारीमा बालविकास शिक्षक तथा विद्यालय कर्मचारीहरुको मासिक तलब रु.१५००० बनाउने भनिएतापनि स्थानीय तहबाट तलबभत्ता दिनुपर्ने बाध्यात्मक कानूनी व्यवस्था नगरिएको, शिक्षकहरुको समयोबद्ध बढुवा तथा तहगत बढुवा गर्ने कुनै पनि आधार तयार नगरिएको, द्वन्द्वपीडित शिक्षहरुको पुनरबहाली तथा क्षतिपूर्तिको व्यवस्था नगरिएको लगायतका विषयमा सरोकारवाला निकायको ध्यानाकर्षण गराइएको छ ।

साथै कोभिडबाट बिरामी हुने शिक्षक तथा विद्यालय कर्मचारीहरुको उपचार खर्च तथा कोरोनाबाट मृत्यु हुने शिक्षक तथा विद्यालय कर्मचारीका परिवारलाई क्षतिपूर्ति तथा राहतको कुनै पनि व्यवस्था नगरिएको लगायतको विषय विज्ञप्तिमा उल्लेख छ ।