Sansar News
जेठ १८, काठमाडौं । प्रधानन्यायाधीश चोलेन्द्रशमशेर राणा वरिष्ठताका आधारमा संवैधानिक इजलास गठन गर्न सहमत भएका छन् । मंगलबार सर्वोच्च बारका प्रतिनिधिसँगको छलफलमा राणाले वरिष्ठ न्यायाधीशहरुको संवैधानिक इजलास गठन गर्न सहमत भएका हुन् ।
सर्वोच्च बारका अध्यक्ष पूर्णंमान शाक्यले बताएअनुसार प्रधानन्यायाधीश राणा र सर्वोच्च बारका प्रतिनिधिबीच यस्तो सहमति जुटेको हो ।
प्रतिनिधि सभा विघटनविरुद्व रिटमाथि सुनुवाई गर्न राणाले आफुँ नेतृत्वमा ५ सदस्यीय संवैधानिक इजलास गठन गरेका थिए । तर, इजलास गठन प्रक्रिया विधिसम्मत नभएको भन्दै विरोध भएको थियो । इजलासमा रहेका दुई न्यायाधीश बमकुमार श्रेष्ठ र तेबहादुर केसीका विषयमा कानून व्यवसायीहरुले प्रश्न उठाएका थिए ।
आइतबारको इजलास नै न्यायाधीशहरुको विषयमा केन्द्रीत भएको थियो । सबै कानून व्यवसायीले दुई न्यायाधीश इजलासबाट हट्नुपर्ने माग राखेका थिए ।
इजलासमा सहभागी अन्य दुई न्यायाधीश दीपक कार्की र आनन्दमोहन भट्टराईले पनि इजलास पुर्नगठन गर्नुपर्ने सुझाब दिएका थिए । धेरै विरोध भएपछि उनले विवादमा तानिएका न्यायाधीशलाई नै स्वनिर्णय गर्न आग्रह गरेका थिए । तर दुवै न्यायाधीशले रहने इच्छा व्यक्त गरेपछि विवाद थप कोचिलिएको हो ।
वि.सं.२०७८ जेठ १८ मंगलवार १३:०४ मा प्रकाशित
