हामी सबैकाे संसारन्यूज

जेठ १९, काठमाडौं । जनता समाजवादी पार्टी (जसपा)का दुवै अध्यक्षले गरेको कारबाहीलाई निर्वाचन आयोगले वैद्यानिकता दिन अस्वीकार गरेको छ । आयोगले बुधबार दुवै पक्षलाई पत्र पठाउँदै दुवै गरेको कारबाही पुष्टी हुने आधार नदेखिएको बताएको हो ।

आयोगका प्रवक्ता राजकुमार श्रेष्ठका अनुसार दुवै पक्षलाई अनुसूचीको ढाँचाअनुसार विवरण पेश गर्न भनिएको छ । साथै आयोगले ठाकुरलाई केन्द्रीय समिति सदस्यहरुको हस्ताक्षरसहितको निर्णय पठाउन माग गरिएको छ ।

‘दुवै पक्षले गरेको कारबाही पुष्टी हुने आधार नदेखिएकाले दुवै पक्षलाई अनुसूचीको ढाँचाअनुसार विवरण पेश गर्न भनेका छौं’ श्रेष्ठले भने, ‘ठाकुरलाई केन्द्रीय समिति सदस्यको हस्ताक्षरसहितको निर्णयको प्रतिलिपि पठाउन भनेका छौं ।’

बुधबार अध्यक्ष उपेन्द्र यादवले आफुँ पक्षीय कार्यकारिणी समितिको बैठक बसालेर अर्का अध्यक्ष महन्थ ठाकुरसहित वरिष्ठ नेता राजेन्द्र महतो, लक्ष्मणलाल कर्ण र सर्वेन्द्रनाथ शुक्लालाई निष्कासन गर्ने निर्णय गरेका थिए भने ठाकुरले पनि आफुँ पक्षीय बैठकबाट उपेन्द्र यादवलाई कारबाही गर्ने निर्णय गराएका थिए ।