Sansar News
जेठ २३, काठमाडौं । जनता समाजवादी पार्टीले प्रदेश २ को संसदीय दलको नेता चुनेको छ । आइतबार जनकपुरधाममा बसेको संसदीय दलको बैठकले प्रदेश २ का मुख्यमन्त्री लालबाबु राउतलाई दलको नेतामा चयन गरेको हो ।
बैठकमा केन्द्रीय अध्यक्ष उपेन्द्र यादव पनि उपस्थित भएका थिए । बैठकले जसपाको संसदीय दलको विधान पारित गर्दै नेता चुनेको हो । बैठक ५५ प्रदेशसभा सदस्यमध्ये ३६ जनाले हस्ताक्षर गरेको बताइएको छ ।
प्रदेश २ मा तत्कालीन समाजवादी पार्टीका ३० र राजपाका २५ सांसद छन् । तर पछिल्लो समीकरणसँगै राजपाका थप केहि सांसद समाजवादी समूह तर्फ लागेका हुन् ।
प्रदेश सरकार फेर्ने योजना बनिरहेको थियो
केन्द्रमा महन्थ ठाकुर समूहसँग सहकार्य गरेका प्रधानमन्त्री केपी शर्मा ओलीले प्रदेशमा पनि सहकार्य गर्ने प्रस्ताव राखेका थिए । दुवैले बहुमत पुर्याएर प्रदेश सरकार परिवर्तन गर्ने खेल सुरु गरेका थिए ।
तर, केन्द्रमा जस्तै सांसदहरु खेलमा सहभागी हुने सम्भावना देखेपछि यादवले संसदीय दलको नेता चयन गरेका हुन् । उनले राउत नेतृत्वकै सरकारलाई निरन्तरता दिन चाहेका छन् ।
पछिल्लो समय पार्टी विभाजन भएसँगै यादवले विपक्षी गठबन्धनसँग बहुमतको लागि सहयोग मागेका थिए । हाल विपक्षी गठबन्धनका कांग्रेस वा माओवादी सहयोग गरेमा राउत नेतृत्वको सरकार टिक्ने अवस्था छ ।
वि.सं.२०७८ जेठ २३ आइतवार १५:२५ मा प्रकाशित
