हामी सबैकाे संसारन्यूज

९ असार, काठमाडौँ । पाँच दलीय विपक्षी गठबन्धनले जनपरिचालनका कार्यक्रम अघि बढाउने निर्णय गरेका छन् ।

बुधबार साँझ काँग्रेस सभापति शेरबहादुर देउवाको निवास बुढानिलकण्ठमा बसेको गठबन्धनको बैठकले प्राप्त उपलब्धिहरु गुम्ने खतरा रहेको निष्कर्ष निकाल्दै संविधान, लोकतन्त्र र राष्ट्रियताका पक्षमा जनपरिचालनका कार्यक्रम बढाउने निर्णय गरेको हो ।

नेकपा(माओवादी केन्द्र)का प्रवक्ता नारायणकाजी श्रेष्ठले संविधान, लोकतन्त्र र राष्ट्रियताका पक्षमा जनपरिचालनका कार्यक्रम अगाडि बढाउने निर्णय भएको जानकारी दिए । उनले कोरोना संक्रमणको लहर केही कम भएपनि स्वास्थ्य मापदण्डलाई ख्याल गर्दै जनपरिचालनका कार्यक्रम अघि बढाइने बताए ।

मंगलबारमात्रै विपक्षी गठबन्धनका शीर्ष नेताहरुले संयुक्त विज्ञप्ति जारी गर्दै प्रधानमन्त्री केपी शर्मा ओलीले जताततै हस्तक्षेप गर्ने, दवाव र धम्की दिने तथा संकीर्ण स्वार्थका लागि जस्तोसुकै काम पनि गर्ने बाटो अंगिकार गरेको, त्यसबाट नेपाली जनताको कष्टपूर्ण संघर्षबाट प्राप्त उपलब्धिहरु नै गुम्ने हुन् कि भन्ने खतरा उत्पन्न भएको र राष्ट्र गम्भीर संकटतर्फ धकेलिएको बताएका थिए

सर्वोच्च अदालतको संवैधानिक इजलासमा बुधबारदेखि नै प्रतिनिधिसभा विघटनको मुद्धाको अन्तिम सुनुवाइ चलिरहेको बेला गठबन्धनको यस्तो निर्णय आउनुलाई  फैसला आफ्नो पक्षमा गराउने उद्देश्यले गरिएको सांकेतिक चेतावनीको रुपमा बुझिएको छ ।

बैठकमा काँग्रेस सभापति देउवा, माओवादी केन्द्रका अध्यक्ष पुष्पकमल दाहाल, एमालेका वरिष्ठ नेता माधव नेपाल, जसपाका अध्यक्ष उपेन्द्र यादव, राष्ट्रिय जनमोर्चाकी उपाध्यक्ष दुर्गा पौडेल लगायतका नेताहरू उपस्थित थिए ।

राष्ट्र गम्भीर संकटतर्फ धकेलिएको छ –विपक्षी गठबन्धन