Sansar News
१५ असार, काठमाडौं । अब साना तथा ठूला सार्वजनिक सवारी साधनहरु शहरी क्षेत्रमा लामो समयसम्म एकै स्थानमा रोकिन पाउने छैनन् ।
काठमाडौं महानगरपालिकाले खुल्लामञ्चस्थित बसपार्क हटाएर सबै सवारी साधनलाई ‘पिक एण्ड ड्रप’ प्रणालीमा सञ्चालन गर्ने निर्णय गरेसँगै अब त्यस्ता सार्वजनिक सवारी साधनहरु एकै स्थानमा लामोसमयसम्म रोकिन नपाउने भएका हुन् । उनीहरुले खुल्लामञ्चमा सवारी पार्किङ समेत गर्न पाउने छैनन् ।
आरएनएसी आसपास, न्युरोड गेट अगाडि र विर अस्पताल अगाडिको रोडमा नै पिक एण्ड ड्रपको सिस्टम अध्यावधी गरेर व्यवस्था मिलाइने बताइएको छ । महानगरपालिका र यातायात व्यवसायीका प्रतिनिधि तथा मजदुरका प्रतिनिधिहरुबीच मंगलबार भएको लामो छलफल पछिको सहमति अनुसार रोडमा नै पिक एण्ड ड्रपको सिस्टम अध्यावधी गरेर व्यवस्था मिलाइने व्यवस्था गरेको महानगर प्रहरी प्रमुख धनपति सापकोटाले बताए ।
काठमाडौं महानगरपालिकाले पुरानो बसपार्क हटाएर काठमाडौं टावर निर्माण गर्न थालेपछि बसपार्कलाई खुल्लामञ्चमा सारिएको थियो । टावर सम्पन्न भएपछि बसपार्क पुन पुरानो स्थानमै बन्ने जानकारी दिँदै उनले खुल्लामञ्चलाई खुल्लामञ्चकै रुपमा प्रयोग गर्नुपर्ने अवस्था भएकाले त्यहाँबाट सञ्चालित बसहरुलाई पुरानो पिक एण्ड ड्रप पद्धतिमा सञ्चालन गर्न लागिएको पनि सापकोटाले बताए ।
File Pic
वि.सं.२०७८ असार १५ मंगलवार २१:०८ मा प्रकाशित
