हामी सबैकाे संसारन्यूज

असार १५, काठमाडौं । नेपालले १० महिनाको अबधिमा करिब ४८ अर्ब बराबरको धान–चामल आयात गरेको छ । भन्सार विभागकोे तथ्यांकअनुसार चालु आर्थिक वर्षको जेठसम्ममा उक्त रकम बराबरको धान–चामल आयात गरेको हो ।

तथ्यांकअनुसार यो अवधीमा नेपालमा १० देशबाट धान–चामल आयात भएको देखिन्छ ।

विभागको तथ्यांकअनुसार ४८ अर्बको धान–चामल आयत गर्ने कृषिप्रधान देशले यो अवधिमा करिब १९ करोड रुपैंयाँ बराबरको चिउरा र मुरही (भुजा) भने निर्यात गरेको छ । तथ्यांकअनुसार जेठसम्ममा नेपालले सो रकम बराबरको भुजा र चिउरा निर्यात गरेको हो ।

यो अवधिमा नेपालले ४८ अरबको धान–चामल आयत गर्दा करिब ४ अर्ब कर संकलन गरेको छ ।

कहाँ–कहाँबाट आयात ?

नेपालले धान–चामल आयत गरेका देशहरुमा भारत, चिन, फिलिपिन्स, थाइलैण्ड, जापान, पपुवान्युगिनी, कोरिया, संयुक्त राज्यअमेरिका, भियतनाम, इटली, टर्कीलगायतका देशहरुबाट धानचामल आयात गर्ने गरेको छ ।

तथ्यांकअनुसार नेपालले सबैभन्दा बढि धान–चामल भारतबाट आयात गरेको छ । भारतपछि नेपालले चीन र अमेरिकाबाट सबैभन्दा बढि आयात गरेको छ ।

त्यस्तै नेपालले अस्ट्रेलियामा सबैभन्दा बढी चिउरा निर्यात गर्ने गरेको छ । विभागको तथ्यांकअनुसार जेठसम्ममा करिब ३ करोड रुपैंयाँ बराबरको चिउरा अस्ट्रेलिया निर्यात भएको छ । त्यस्तै हङ्कङ र जापानमा मात्र मुरही निर्यात गरेको छ ।

धान–चामलको आयात निरन्तर बढ्दै

आर्थिक वर्ष २०७८/०७९ को बजेटमा सरकारले ५ वर्षको अवधिमा धान उत्पादनमा आत्मनिर्भर हुने लक्ष्य लिएको छ । तर, उत्पादनको स्तर र आयातको अवस्थालाई हेर्दा त्यो लक्ष्य निकै मित्थ्या लाग्छ । एकातिर कृषि विभागको तथ्यांकले धान उत्पादन सामान्य अपेक्षाअनुसारको पनि नभएको बताउँछ भने भन्सार विभागको तथ्यांकले धान–चामल आयात वर्षेनी बढिरहेको देखाउँछ ।

कृषि विभागका अनुसार चालु आर्थिक वर्ष २०७७/०७८ मा ५६ लाख २१ हजार मेट्रिक टन धान उत्पादन भएको छ । विभागका अनुसार १४ लाख ७३ हजार हेक्टर क्षेत्रफलमा सो धान उत्पादन भएको हो । विभागले बताएअनुसार यो उत्पादन गत वर्षभन्दा केहि हजार मेट्रिक टन मात्रै बढि हो ।

सँगै भन्सार विभागको तथ्यांकअनुसार पछिल्लो १० महिनाको अवधिमा मात्रै नेपालले ४८ अर्बको धान–चामल आयात गरेको छ । विभागका सुचना अधिकारी शिशिर घिमिरले बताएअनुसार यो तथ्यांक विगतका वर्षहरुका भन्दा धेरै बढी हो ।