हामी सबैकाे संसारन्यूज

असार १६, काठमाडौं । प्रहरी कार्यालयमा पुगेर छुवाछुत आरोपितलाई छुटाएका शिक्षामन्त्री कृष्णगोपाल श्रेष्ठले माफी मागेका छन् । मंगलबार दिउँसो राष्ट्रिय मानव अधिकार आयोगको कार्यालय पुगेर उनले माफी मागेका हुन् ।

उनले आफुँबाट गल्ती भएको स्विकार्दै अबको समय त्यस्तो नगर्ने बाचा आयुक्तहरु समक्ष गरेका थिए ।

छुवाछुत आरोपमा समातिएकी सरस्वती प्रधानलाई छुटाउन मन्त्री श्रेष्ठ ९ असारमा झण्डावाल गाडी लिएर महानगरीय प्रहरी वृत्त सिंहदरबार पुगेका थिए । उनले आफ्नै झण्डावाल गाडीमा हालेर प्रधानलाई बबरमहलस्थित घरसम्म छोडेका थिए ।

सञ्चारकर्मी रुपा सुनारले आफुँलाई दलित भएकै कारण घरमा कोठा नदिएको भन्दै उजुरी गरेपछि प्रधान असार ६ मा पक्राउ परेकी थिइन् । उनी तीन दिनदेखि हिरासतमा थिइन् ।

प्रधानमन्त्रीले सचेत बनाएका थिए

प्रधानलाई छुटाएर आलोचित भएका मन्त्री श्रेष्ठलाई सोमबारको मन्त्रिपरिषद बैठकमा प्रधानमन्त्री केपी ओलीले सचेत बनाएका थिए । उनले ‘तपाईँले ठीक गर्नुभएन’ भन्दै श्रेष्ठलाई सचेत बनाएका थिए ।

प्रधानमन्त्रीले सच्चिने गरि काम गर्न निर्देशन दिएलगत्तै उनी आयोग पुगेर माफी मागेका हुन् ।