Sansar News
असार २०, काठमाडौं । नेकपा (एमाले)का अध्यक्ष केपी शर्मा ओली पक्षीय नेताहरुले नेता माधवकुमार नेपालसँग भेटघाट गरेका छन् । पार्टीको विवाद विभाजनको स्थितिमा पुगेका बेला आइतबार बिहान उनीहरु नेता नेपाललाई उनकै निवासमा पुगेर भेटेका हुन् ।
ओली पक्षका नेताहरु सुवास नेम्वाङ, विष्णु पौडेल र शंकर पोखरेल आइतबार बिहान कोटेश्वर पुगेका थिए । उनीहरुले नेता नेपाललाई ओलीसँग भेट गरेर छलफल गर्न सुझाएको बताएको छ । नेता नेपालले भने समूहमा छलफल गरेपश्चात मात्रै जवाफ दिने बताएको बुझिएको छ ।
‘पार्टी एकतालाई बचाउन अध्यक्ष र तपाईँबीच गम्भीर रुपमा कुरा गर्नुपर्यो भन्यौं, उहाँले प्रस्ताव सकारात्मक भएको बताउँदै साथीहरुसँग छलफल पश्चात जवाफ दिउँला भन्नुभयो ।’, भेटमा सहभागी एक नेताले भने ।
बताइएअनुसार नेता नेपालले अदालतमा बुझाएको हस्ताक्षर फिर्ता नलिने जवाफ दिएका छन् । एमालेको केन्द्रीय कमिटी बैठले समयसीमा तोकेरै कांग्रेस सभापति शेरबहादुर देउवालाई प्रधानमन्त्री बनाउन बुझाइएको हस्ताक्षर फिर्ता लिन निर्देशन दिएको थियो । उक्त हस्ताक्षर फिर्ता नलिनेहरू एमाले नहुने ओलीले बताइसकेका छन् ।
भेटमा माधव पक्षीय नेताहरु घनश्याम भुसाल, भीम आचार्य, सुरेन्द्र पाण्डेलगायत पनि सहभागी थिए ।
वि.सं.२०७८ असार २० आइतवार १२:११ मा प्रकाशित
