Sansar News
२३ असार, काठमाडौं । कामचलाउ सरकरका उपप्रधान तथा अर्थमन्त्री विष्णुप्रसाद पौडेलले आगामी आर्थिक वर्षको बजेट कार्यान्वयनमा आफुँ खरो रुपमा प्रस्तुत हुने बताएका छन् । बुधबार अर्थ मन्त्रालयमा आयोजित आगामी आर्थिक वर्ष २०७८/७९ को बजेट कार्यान्वयनको सन्दर्भमा सम्बन्धित कार्य सम्पादन सम्झौतामा हस्ताक्षर कार्यक्रममा बोल्दै मन्त्री पौडेलले खरो रुपमा उत्रिने बताएका हुन् ।
बजेट कार्यान्वयनका लागि मन्त्रीका हैसियतले गर्नुपर्ने सबै काम र सहयोग गर्ने बताउँदै अर्थमन्त्री पौडेलले आवश्यक जस्तो सुकै कदम र प्रयत्न गर्न आफु पछि नहट्ने बताए । सबैसँगको समन्वयमा बजेट कार्यान्वयनमा राम्रो नतिजा ल्याउने सकिने भन्दै उनले बजेट प्रस्तुत हुन्छ, कार्यान्वयन हुँदैन भन्ने विगतका मानकमा परिवर्तन ल्याउने गरी काम गर्ने प्रतिबद्धता व्यक्त गरे ।
मन्त्री पौडेलले आगामी वर्षको बजेट कार्यान्वयनका लागि अहिले देखिनै तयारी भइरहेकाले साउनदेखि नै बजेट कार्यान्वयनले गति लिने विश्वास व्यक्त गरे । सो अवसरमा उनले कुनै पनि प्रकारको कमजोरी हुन नदिने गरी जिम्मेवारी निर्वाह गर्न समेत कर्मचारीहरुलाई निर्देशन दिए ।
कार्यक्रममा अर्थसचिव शिशिरकुमार ढुङ्गानाले साउन १ गतेदेखि नै आगामी वर्षको बजेट कार्यान्वयनका लागि बलियो आधार तयार भएको भन्दै आ–आफ्नो जिम्मेवारीबोध गरेर काम गर्न जरुरी रहेको बताए ।
वि.सं.२०७८ असार २३ बुधवार २२:०९ मा प्रकाशित
