हामी सबैकाे संसारन्यूज

काठमाडौं। जेन्जी आन्दोलनका क्रममा केन्द्रीय कारागारबाट फरार भएका वन्यजन्तु अपराधसम्बन्धी मुद्दाका एक अभियुक्तलाई प्रहरीले पक्राउ गरेको छ।

प्रहरीका अनुसार संरक्षित वन्यजन्तु ध्वाँसे चितुवाको छाला अवैध रूपमा ओसारपसार तथा खरिद–बिक्री गरेको आरोपमा पक्राउ परेका रसुवा उत्तरगया गाउँपालिका–९ का ३८ वर्षीय टेक बहादुर तामाङ काठमाडौं जिल्ला अदालतको आदेशअनुसार केन्द्रीय कारागार कार्यालय, जगन्नाथदेवलमा पुर्पक्षका लागि थुनामा रहेका थिए।

गत २०८२ साल भदौ २४ गते जेन्जी आन्दोलनका क्रममा कारागारबाट फरार भएका तामाङलाई खोजतलासका क्रममा प्रहरी टोलीले काठमाडौं महानगरको तारकेश्वर नगरपालिका–८, जरङ्खुबाट पक्राउ गरेको हो।

पक्राउ परेका तामाङ हाल तारकेश्वर नगरपालिका–८ मा बसोबास गर्दै आएका थिए। फरार अभियुक्तको खोजीका लागि निरन्तर परिचालन गरिएको प्रहरी टोलीले उनलाई २०८३ साल असार २ गते नियन्त्रणमा लिन सफल भएको जनाएको छ।

पक्राउपछि तामाङलाई आवश्यक कानुनी प्रक्रिया पूरा गरी पुनः केन्द्रीय कारागार कार्यालय, जगन्नाथदेवलमा बुझाइएको प्रहरीले जानकारी दिएको छ।

प्रहरीले फरार अभियुक्तहरूको खोजी तथा पक्राउ अभियानलाई निरन्तरता दिइरहेको जनाएको छ।