Sansar News
५ फागुन, ताप्लेजुङ । ताप्लेजुङमा मङ्गलबारदेखि सुरु भएको दोस्रो पाथीभरा राष्ट्रिय भलिबल प्रतियोगिताअन्तर्गत बुधबारको खेलमा नेपाल पुलिस क्लब र पूर्वाञ्चल क्षेत्रीय टिम विजयी भएका छन् ।
दुई विभागीय टिम पुलिस र एपिएफबीच भएको पहिलो खेलमा पुलिसले २६–२४, २५–१७ र २५–११ को सोझो सेटमा हराएको हो ।
यता पूर्वाञ्चलले मध्यमाञ्चललाई भने ३–२ को सेटमा हराएको छ । २५–१३, २७–२५, २२–२५, २०–२५ र १५–८ ले पूर्वाञ्चल विजयी भएको हो । अहिलेसम्म ६ अङ्क जोड्दै पुलिस शीर्षस्थानमा रहेको छ भने आर्मी ३ अङ्कका साथ दोस्रो स्थानमा छ ।
यस्तै बिहीबार बिहान ११ बजे हुने पहिलो खेलमा पूर्वाञ्चल र आर्मी तथा दिउँसो १ बजे हुने खेलमा मध्यमाञ्चल र एपिएफबीच प्रतिस्पर्धा हुनेछ । प्रतियोगितामा तीन विभागीय टिमसहित पूर्वाञ्चल, मध्यमाञ्चल र पश्चिमाञ्चल सहभागी छन् ।
प्रतियोगिताका विजेतालाई रु तीन लाख ३० हजार र उपविजेतालाई रु एक लाख ६५ हजार पुरस्कार प्रदान गरिने आयोजकले बताएको छ । खेल पर्यटनका माध्यमबाट जिल्लालाई देश तथा विदेशमा प्रचारप्रसार गर्ने उद्देश्यका साथ आयोजना गरिएको यो प्रतियोगिता फागुन ७ गते सम्पन्न हुनेछ ।
वि.सं.२०७३ फागुन ५ बिहीवार ०२:५६ मा प्रकाशित
