हामी सबैकाे संसारन्यूज

२६ असार, काठमाडौं । नेकपा माओवादी केन्द्रका अध्यक्ष पुष्पकमल दाहाल प्रचण्ड र नेकपा एमालेका वरिष्ठ नेता माधवकुमार नेपालबीच भेटवार्ता भएको छ ।

नेकपा एमालेको विवाद समाधानका लागि गठित कार्यदलको बैठक बस्नु केहीबेर अघि अध्यक्ष प्रचण्ड नेपाललाई भेट्न नेपालको निवासस्थान कोटेश्वर पुगेका थिए ।

उनले एमाले अध्यक्ष एवं प्रधानमन्त्री केपी शर्मा ओलीले धोकादिन सक्ने भन्दै पाँच दलीय गठबन्धनको साथ नछाड्न सुझाव दिएको स्रोतले जनाएको छ । ओली विश्वासयोग्य नेता नभएको, उनीबाट जतिबेला पनि धोका हुन सक्ने भन्दै आफूहरुको साथ नछाड्न भनेका थिए ।

अध्यक्ष प्रचण्डले सर्वोच्च अदालतको हस्ताक्षर फिर्ता गराउने ओलिको चाला मात्र भएको बताउँदै सतर्क समेत गराएका थिए ।

नेता नेपालले आफूले सर्वोच्च अदालतको हस्ताक्षर फिर्ता लिने या त्यसको निर्णय प्रभावित हुने गरी कुनै कदम नचाल्ने प्रतिबद्धता दोहो¥याएका छन् । उनले आफू निकटका नेताहरूसँग छलफल गरेर अघि बढ्ने जवाफ दिएको बताइएको छ ।

सर्वोच्च अदालतले संसद विघटनविरुद्धको मुद्दामा फैसला गर्ने तयारी गरेको र नेकपा एमालेको विवाद समाधानका लागि गठित कार्यदलको शुक्रबारको बैठकले गरेको ५ बुँदे सहमतिलाई आज सार्वजनिक गर्ने भनिएको बेला भएको यो भेटवार्तालाई अर्थपूर्ण रुपमा हेरिएको छ ।

माधव नेपाललाई भेटेलगत्तै अध्यक्ष प्रचण्ड नेपाली काँग्रेसका सभापति शेरबहादुर देउवालाई भेट्न बुढानिलकण्ठ पुगेका थिए । उनले देउवालाई माधव नेपालसँग भएको भेटका बारेमा जानकारी गराएको बुझिएको छ ।