हामी सबैकाे संसारन्यूज

२६ असार, काठमाडौँ । नेकपा एमाले एकता कार्यदलको शनिबारको बैठक निष्कर्षविहिन भएको छ ।

यसअघि शुक्रबार पनि कार्यदलका सदस्यहरूले शनिबार एकताको घोषणा हुने बताउँदै आएपनि आजको कार्यदलको बैठक निष्कर्षमा पुग्न नसकेको हो ।

शनिबारको बैठकपछि पत्रकारसँग कुरा गर्दै रघु पन्तले पार्टीभित्रको समग्र समस्या समाधान खोजिएको र आइतबार सम्भवत सुखद् समाचार आउने बताएका छन् ।

उनले प्याकेजमै समस्या समाधान खोजेकाले आज ढिला भएकोे जानकारी दिँदै आइतबारको बैठकले सुखद् खबर आउने बताएका छन् ।

यसअघि आजको कार्यदलको बैठक बस्न ढिला भएको थियो । दुई बजे बस्ने भनिएको बैठक सुरु हुन ढिला भएपछि महत्वपूर्ण विषयमा छलफल गर्न भन्दै वरिष्ठ नेता माधव नेपाल समूहका नेताहरु कोटेश्वर पुगेका थिए । उनीहरु बैठकमा फर्किएसँगै बैठक सुरु भएको थियो ।

कार्यदलमा अध्यक्ष केपी शर्मा ओली पक्षबाट सुवास नेम्वाङको नेतृत्वमा विष्णु पौडेल, प्रदीप ज्ञवाली, शंकर पोखरेल र विष्णु रिमाल छन् भने नेता नेपालको पक्षबाट भीम रावलको नेतृत्वमा घनश्याम भुसाल, सुरेन्द्र पाण्डे, गोकर्ण विष्ट र रघुजी पन्त रहेका छन् ।