हामी सबैकाे संसारन्यूज

असार २७, काठमाडौं । नेकपा (एमाले)का उपाध्यक्ष एवं राष्ट्रिय सभा सदस्य वामदेव गौतमले आफुँ प्रधानमन्त्री केपी शर्मा ओली समूहमा नगएको प्रष्टीकरण दिएका छन् । आइतबार राष्ट्रिय सभा बैठकलाई सम्बोधन गर्दै उनले यस्तो प्रष्टीकरण दिएका हुन् ।

गौतमले आफुँ ओली समूहको बैठकमा नभई बैठकमा गएको बताए । ‘पार्टी अध्यक्ष कमरेड केपी ओलीले ०७५ साल जेठ २ को अवस्थामा केन्द्रीय कमिटीको बैठक बोलाउनु, म त्यो बैठकमा भाग लिन गएँ, धेरै मानिसहरुले वामदेव केपी तिर गयो भनेर भने’, गौतमले भने, ‘मैंले यो सभा मार्फत जानकारी गराउन चाहन्छु म कुनै तर्फ गएको होइन्, म नेकपा एमाले भएको हुनाले एमाले भएको प्रमाण पेश गर्न गएको हो ।’

उनले आफ्नो बारेमा माधव समूहले पारित गरेको प्रस्ताव गलत भएको पनि बताए । उनले आफुँ कुनै पक्षमा नभई एमाले एकताको पक्षमा रहेको बताए ।

‘कतिपयले आफ्नो समूहमा दुःखको प्रस्ताव पनि पारित गर्नुभएछ । मेरो बारेमा जेजस्तो भएपनि प्रस्ताव पारित हुनु राम्रै हो’, उनले भने, ‘तर, म कुनै समूहमा छैन्, म एमाले एकताको पक्षमा छु तर, मैंले पार्टीमा गईसके पछि जे भूमिका निर्वाह गर्छु भनेको थिएँ यद्यपि मैंले त्यो भूमिका प्राप्त गर्न सकेको छैन् ।’

उनले एमाले एकता सर्वोच्च अदालतको फैसलापश्चात भएमा उपयुक्त हुने पनि बताएका छन् । उनका अनुसार सर्वोच्चको जे–जस्तो फैसला आएपनि एमाले मिल्नुपर्छ ।