हामी सबैकाे संसारन्यूज

असार २७, काठमाडौं । नेकपा (एमाले)मा देखिएको विवाद समाधानका लागि गठित कार्यदलको बैठक झण्डै ६ घण्टादेखि सिंहदरबारमा जारी छ । आइतबार बिहान ९ बजेदेखि बैठक बसिरहेको छ ।

कार्यदलका सदस्यहरुले आज नै सहमतिको घोषणा हुने पनि बताएका छन् । आइतबार बैठकस्थलमा प्रवेश गर्दै गर्दा नेता माधवकुमार नेपाल पक्षका कार्यदल सदस्य गोकर्ण विष्टले आज नै सुखद समाचार आउने प्रतिक्रिया दिएका थिए ।

तर, एमाले उच्च स्रोतले बताएअनुसार चर्चा भएअनुसार सहमति बनिसकेको छैन् । एमाले कार्यदलले सहमतिका लागि मस्यौदा तयार गरेको भएपनि मस्यौदामा भएका विषयमा दुवै पक्ष सहमत छैनन् ।

कहाँ अड्कीएको छ विवाद ?

दुई पक्षबीच सहमतीको खोजी स्वरुप कार्यदलले मध्यमार्गी बाटोसहितको मस्यौदा तयार गरेको छ । एमाले उच्च स्रोतका अनुसार मस्यौदा तयार पारेको भए पनि दुवै पक्ष मस्यौदामा उल्लेखित विषयप्रति सहमत हुने अवस्थामा छैनन् ।

बताइएअनुसार न ओली पक्ष ०७५ जेठ २ को अवस्थामा फर्कन तयार छ न त माधव पक्ष विपक्षी गठबन्धनमा नरहेको प्रष्ट पार्न तयार छ । यहाँ दुवै पक्षबीच सहमतिको खोजी गर्ने कार्यदल सदस्यबीच पनि विवाद देखिएको उच्च स्रोतले बताएको छ ।

स्रोतले उल्लेख गरेअनुसार पछिल्लो समय माधव पक्षले दोस्रो अध्यक्षसहित सरकार सञ्चालनदेखि अन्य कुरामा आफ्नो हिस्सा खोजेको छ । तर, तत्कालिन नेकपामा पनि सरकार सञ्चालन र पार्टी सञ्चालनमा एकाधिकार कायम गरेका ओलीले ती विषयमा सिधै असहमती जनाएका छन् ।

यता माधव पक्ष विपक्षी गठबन्धनसँग मिलेर अदालतमा बुझाएको हस्ताक्षरका सन्दर्भमा बढि सजग देखिएको छ । उसले सहमतीका बुँदामा पनि अदालतकको फैसलालाई प्रभावित पार्ने कुनै शब्द राख्न नपाईने बताईरहेको छ ।

नेता माधव नेपालले आइतबार बैठक सुरु हुनुभन्दा अघि नै आफुँ पक्षीय कार्यदलका सदस्यहरुलाई बोलाएर सहमतीको भाषा अदालतको फैसलालाई प्रभावित पार्ने आएमा आफुँले स्वीकार नगर्ने प्रष्ट पारेका थिए । एमाले एक भएको सन्देश दिँदा सर्वोच्चको फैसला प्रभावित हुने बुझाई माधव पक्षको देखिन्छ ।