हामी सबैकाे संसारन्यूज

असार २७, काठमाडौं । निर्वाचन आयोगले नेकपा (माओवादी केन्द्र) वैधानिक रहेको ठहर गरेको छ । आयोगको आइतबार बसेको बैठकले माओवादी केन्द्र अवैधानिक रहेको भन्दै परेको निवेदन र दावीलाई खारेज गरिदिएको हो ।

आयोगका प्रवक्ता राजकुमार श्रेष्ठका अनुसार माओवादी केन्द्रको दर्ता खारेजी गर्नुपर्ने मागमा कुनै कारण नदेखिएको बैठकले निष्कर्ष निकालेको छ ।

‘माओवादी केन्द्रको दल दर्ता खारेजीको निवेदन परेको थियो, आयोगले त्यो निवेदनलाई खारेज गरेको छ’, श्रेष्ठले भनेका छन्, ‘आयोगले माओवादी केन्द्र वैधानिक रुपमा सञ्चालनमा रहेको ठहर गरेको छ ।’

माओवादी केन्द्र अवैधानिक रुपमा सञ्चालन रहेको दाबी गर्दै एमालेका पूर्वमाओवादी समूहका नेताहरुले अधिवक्ता सरोज बुढाथोकीमार्फत असार २३ मा आयोगमा दल दर्ता खारेजीको माग गर्दै निवेदन दिएका थिए । उनीहरुले आफुँहरुमाथि माओवादी केन्द्र गरेको कारबाही पनि अवैध रहेको जिकिर गरेका थिए ।

यी हुन् आयोगले औंल्याएका ५ आधार

१. एकीकृत नेपाल कम्युनिष्ट पार्टी (माओवादी), नेपाल गौरवशाली पार्टी र अन्य राजनीतिक दल मिलेर नेपाल कम्युनिष्ट पार्टी (माओवादी केन्द्र)को नाममा निर्वाचन आयोगमा २०७३ साउन ३२ मा दर्ता भएको ।

२. सोही दर्ताको निर्णयअनुसार माओवादी केन्द्र २०७४ मा भएको निर्वाचनमा भाग लिएको ।

३. २०७५ जेठ २३ मा नेकपा (एमाले) र नेकपा (माओवादी केन्द्र)बीच एकता भएको ।

४. सर्वोच्च अदालतले २०७७ फागुन २३ मा दिएको फैसला र सोही फैसलाअनुसार निर्वाचन आयोगले फागुन २५ मा गरेको निर्णयअनुसार माओवादी केन्द्र साबिककै अवस्थामा फर्किएको ।

५. सर्वोच्चको फैसला र आयोगको निर्णयअनुसार ०७७ फागुन २४ मा नेपाल राजपत्रमा नेकपा (माओवादी केन्द्र) साबिककै अवस्थामा फर्किएको सूचना ।