हामी सबैकाे संसारन्यूज

३० असार, काठमाडौं । नेकपा एमालेका अध्यक्ष तथा निर्वतमान प्रधानमन्त्री केपी शर्मा ओलीले आज बालुवाटारको सरकारी निवास छोडेर बालकोट जाँदैछन् ।

आज बिहान बालुवाटार छोडेर बालकोट जान लागेका निर्वतमान प्रधानमन्त्री ओलीलाई एमालेका युवानेता महेश बस्नेतको टोलीले स्कर्टिङ गरेर बालकोट पुर्याउने बताइएको छ ।

नेता बस्नेतले मंगलबारै सूचना जारी गर्दै बुधवार ११ बजे बालुवाटारमा भेला भएर नारा जुलुशसहित हजारौं बाइक र गाडीले स्कर्टिङ गर्दै ओलीलाई बालकोट पुर्याइने बताउँदै यसका लागि युथफोर्सका कार्यकतालाई बालुवाटारमा उपस्थित हुन समेत आव्हान गरेका छन् ।

मंगलबार एक सूचना जारी गर्दै बस्नेतले भनेका छन्,‘बालुवाटार प्रधानमन्त्री कार्यालयदेखि नेकपा एमालेका श्रद्धेय अध्यक्ष क.केपी शर्मा ओलीलाई हजारौँ बाइक, गाडीले स्कटिङ्ग र स्वागत गर्दै भक्तपुरको कौशलटारदेखि बालकोट निवाससम्म नागरिक अभिनन्दन सहित प्रस्थान गराउने कार्यक्रममा सहभागिताको लागि सबैलाई हार्दिक आमन्त्रण गर्दछौं ।’

सर्वोच्च अदालतले सोमबार प्रतिनिधिसभा विघटनलाई बदर गर्दै नेपाली कांग्रेसका सभापति शेरबहादुर देउवालाई २८ घण्टाभित्र प्रधानम्नत्रीमा नियुक्त गर्न परमादेश जारी गरेपछि नेता बस्नेतले सर्वोच्चको उक्त कदमलाई असंबैधानिक भन्दै परमादेश कार्यान्वयन हुन असम्भव रहेको टिप्पणी समेत गरेका थिए ।