Sansar News
३० असार, काठमाडौं । उर्जा, जलस्रोत तथा सिंचाईमन्त्री पम्फा भुसालले सबै मिलेर देश र जनताको सपना पूरा गर्न मिलेर जानुपर्ने बताएकी छन् ।
बुधबार उर्जामन्त्रीको पदबहालीका क्रममा मन्त्रालयका सचिव, विभागिय प्रमुखहरू तथा सहसचिवहरूसहितको बैठकमा मन्त्री भुसालले आफु जनताको छोरी रहेको र जनताको जनयुद्वबाट यहाँसम्म आएको बताउँदै आफुसँग कुनै स्वार्थ नरहेको भन्दै एउटै स्वार्थ परिणाम निकाल्ने गरि काम गर्ने मात्र रहेको बताएकी छन् ।
‘काममा कुनै पूर्वाग्रह राख्दिन तर परिणाममुखी काम निकाल्नुपर्छ । हामीले जहिल्यै लक्ष्य राख्ने तर लक्ष्य पूरा नगर्ने हुँदै आएको छ ।
एक/दुईवटा मात्र लक्ष्य पूरा हुने गरेका छन् । यो सुधार हुनुपर्छ,’ मन्त्री भुसालले भनिन्, ‘अहिले लोडसेडिङको समस्या जल्दोबल्दो छ ।
लोडसेडिङ कहिल्यै नहुनेमा जोड दिऔं । बिजुली बत्ती बाल्नै नपाउनेहरू छन् उनीहरूसँग बिजुलीको पहुँच चाँडो पुर्याउनुपर्छ ।’
मन्त्री भुसालले कृषि प्रधान देश भनिए पनि सिँचाईको समस्या ठूलो रहेको र सबै कृषियोग्य ठाउँमा १२ महिना नै सिचाई पुर्याउनेमा लाग्नुपर्ने बताइन् ।
‘अहिले बाढि पहिरो र भुक्षय बढेको छ, हामीले हाम्रो जिम्मेवारी पूरा गरेर विभिन्न निकायसँग समन्वय गरेर यसको रोकथाम तथा नियन्त्रणमा सक्दो कदम चाल्नुपर्छ ।’ मन्त्री भुसालले भनिन् ।
वि.सं.२०७८ असार ३० बुधवार १३:२८ मा प्रकाशित
