हामी सबैकाे संसारन्यूज

असार ३०, काठमाडौं । सामाजिक सञ्जालमा राष्ट्रपति विद्यादेवी भण्डारीको एउटा तस्बिर भाइरल बनेको छ । आँखामा पट्टि लगाइएको उक्त तस्बिर शेयर गर्दै सामाजिक सञ्जाल प्रयोगकर्ताले सत्ता गठबन्धन र प्रधानमन्त्री शेरबहादुर देउवाको विरोध गरेका छन् ।

नेकपा (एमाले)का नेता एवं पूर्वमन्त्री लालबाबु पण्डितले पनि उक्त तस्बिर शेयर गर्दै ‘नयाँ सरकारले गरेको पहिलो अपराध’ भनेका छन् । तस्बिर शेयर गर्दै उनले भनेका छन्, ‘नयाँ सरकारको पहिलो अपराध फोटोमा गणतन्त्रको मजाक ।’

के हो वास्तविकता ?

सामाजिक सञ्जालमा भाइरल बनेको र विशेषतः नेकपा (एमाले)को निवर्तमान प्रधानमन्त्री केपी शर्मा ओली पक्षबाट शेयर गरिएको तस्बिर खासमा राष्ट्रिय समाचार समिति (रासस)बाट लिइएको हो । तस्बिर राससका फोटो पत्रकार रोशन सापकोटाले लिएका हुन् ।

तस्बिर प्रधानमन्त्री तथा मन्त्रिपरिषदको कार्यालयको हो । प्रधानमन्त्रीमा नियुक्त भएपश्चात शेरबहादुर देउवाले राखेको मन्त्रिपरिषद बैठकको तस्बिर हो ।

सामाजिक सञ्जालमा चर्चा गरिएअनुसार तस्बिरमा सेतो पट्टि भने लगाइएको छैन् । मन्त्रिपरिषद कार्यालयले बताएअनुसार कोठामा भएको बत्तीको प्रभाव राष्ट्रपतिको तस्बिर भएको फ्रेममा पर्दा यस्तो देखिएको हो ।

कोठामा भएको बत्ति बाल्दा तस्बिरमा सेतो पट्टि बाँधिएको जस्तो देखिने र नबाल्दा सामान्य जस्तो देखिने कार्यालयले जनाएको छ ।