Sansar News
३१ असार, काठमाण्डौ । सर्वोच्च अदालतले विप्लव नेतृत्वको नेपाल कम्युनिष्ट पार्टीका केन्द्रीय सचिवालय सदस्य हेमन्त प्रकाश वली ‘सुदर्शन’लाई रिहा गर्न आदेश दिएको छ ।
न्यायाधीश प्रकाशकुमार ढुङ्गाना र मनोजकुमार शर्माको इजलासले वलीलाई साधारण तारेखमा छाड्न आदेश दिएको हो ।
स्वास्थ्य अवस्था बिग्रीएपछि सहिद गंगालाल राष्ट्रिय मुटुरोग केन्द्रमा उपचाररत रहेका वलीलाई थुनामा राखेर पुर्पक्ष गर्न लगाउनु ‘मानवीय दृष्टिले मनासिव नदेखिएको’ सर्वोच्चको आदेशमा उल्लेख छ । आदेशमा ‘पछि मुद्दामा प्रमाण बुझ्दै जाँदा ठहर भए बमोजिम हुने गरी साधारण तारेखमा राखेर छाड्न’ भनिएको छ ।
वली २०७५ चैत्र १२ गते ओली काभ्रेबाट पक्राउ परेका थिए । उनलाई जिल्ला अदालत ललितपुरले नख्खुस्थित एनसेल मुख्यालयमा बम विस्फोट गराएको आरोपमा हातहतियार तथा खरखजाना, विस्फोटक पदार्थ, राजद्रोह र संगठित अपराधसम्बन्धी कसुरमा २०७६ साल जेठ १० गते पुर्पक्षका लागि थुनामा पठाएको थियो ।
जिल्ला अदालतको आदेश वेरितको भन्दै वलीले उच्च अदालत पाटनमा निवदेन दिएका थिए । उच्च अदालतले पनि वलीलाई पुर्पक्षका लागि थुनामा राख्ने जिल्ला अदालतको आदेशलाई सदर गरेको थियो । आदेशविरुद्ध वलीले सर्वोच्च अदालतमा निवेदन दिएका थिए ।
उनको रिहाईका लागि वरिष्ठ अधिवक्ता एकराज भण्डारी तथा अधिवक्ता कपिलचन्द्र पोखरेल, कान्तिराम ढुंगाना, खिमानन्द अधिकारी र प्रकाश महर्जनले बहस गरेका थिए ।
वि.सं.२०७८ असार ३१ बिहीवार १९:४४ मा प्रकाशित
