Sansar News
३ साउन, काठमाडौं । नेकपा (एमाले)को स्थायी कमिटी बैठक आज बस्दैछ । बिहान ११ बजे ललितपुरको च्यासलस्थित तुल्सीलाल स्मृति प्रतिष्ठानमा बैठक बस्न लागेको हो ।
दोस्रो पटक पुनर्स्थापना भएको प्रतिनिधि सभाको बैठक बस्नु अघि एमालेले स्थायी कमिटी बैठक बोलाएको हो । प्रतिनिधिसभाको बैठक आज अपराह्न ४ बजे बस्दैछ ।
पार्टी अध्यक्ष केपी शर्मा ओली प्रधानमन्त्रीबाट च्युत हुनुका साथै संसद पुनर्स्थापना भैसकेपछि पार्टीभित्र देखिएको समस्याको विषयमा छलफललाई निरन्तरता दिन बैठक बोलाइएको हो ।
यसअघि शुक्रबार पनि एमाले स्थायी कमिटी र संसदीय दलको बैठक बसेको थियो । बैठकले संसद पुनर्स्थापना पछि पार्टीभित्र देखिएको समस्याको विषयमा छलफललाई निरन्तरता दिइने एमाले कार्यालयका सचिव शेरबहादुर तामाङले जानकारी दिए । त्यस्तै बैठकले भोलि (सोमबार) बस्ने केन्द्रीय कमिटी बैठकको एजेण्डा पनि तय गर्ने तामाङले बताए ।
आजको स्थायी कमिटी बैठकमा पनि वरिष्ठ नेता माधवकुमार नेपाल समूह सहभागी नहुने भएको छ । सहमतिवेगर बैठक बोलाइएको भन्दै माधव पक्ष सहभागी नहुने भएको हो ।
स्थायी कमिटी र दलको दुवै बैठकमा वरिष्ठ नेता माधवकुमार नेपाल समूहका नेताहरु भने सहभागी भएका थिएनन् ।
File pic
वि.सं.२०७८ साउन ३ आइतवार ०९:२७ मा प्रकाशित
