हामी सबैकाे संसारन्यूज

३ साउन, काठमाडौं । कोरोना संक्रमणबाट आइतवार बागमती प्रदेशमा ८ जनाको मृत्यु भएको छ ।

प्रदेशको सामाजिक विकास मन्त्रालयका अनुसार काठमाडौंका ७८ वर्षीय पुरुष र ७१ र ८८ वर्षीया २ महिला गरी ३ जना, चितवनका ४८ र ६० वर्षीय २ पुरुष, ललितपुरका ६३ वर्षीय पुरुष र नुवाकोटकी ७७ वर्षीया महिला गरेर ८ जनाको मृत्यु भएको हो ।

शनिवार थपिएका ८ जनासँगै प्रदेशमा संक्रमणबाट ज्यान गुमाउनेको संख्या ३,९५५ पुगेको छ ।

प्रदेशमा शनिवार पिसीआर र ऐन्टिजेन गरी ५१२५ नमुना परीक्षणमा ८३५ जनामा संक्रमण पुष्टि भएको छ । संक्रमित हुनेमा सबैभन्दा बढी काठमाडौं, ललितपुर र मकवानपुर रहेका छन् ।

शनिवार थपिएका ८३५ जनासँगै प्रदेशमा हालसम्म संक्रमित हुनेको संख्या ३ लाख ५८ हजार १५२ पुगेको छ । कूल संक्रमित मध्ये ३ लाख ४५ हजार ४५५ जना निको भइसकेका छन् । प्रदेशमा हाल ३३० जना आइसीयु र १०८ जना भेन्टिलेटरमा उपचाररत छन् ।