हामी सबैकाे संसारन्यूज

३ साउन, काठमाडौं । जनता समाजवादी पार्टी (जसपा) का अध्यक्ष महन्थ ठाकुरले प्रधानमन्त्री शेरबहादुर देउवालाई विश्वासको मत दिने बताएका छन् ।

प्रतिनिधिसभाको बैठकमा बोल्दै अध्यक्ष ठाकुरले प्रधामन्त्री देउवालाई बधाई तथा कार्यकालको शुभकामना दिँदै विश्वासको मत दिने बताएका छन् ।

अध्यक्ष ठाकुरले मत दिने प्रतिबद्धता गर्दै सत्ता संघर्षमा जो प्रताडित, समुह, पीडित समुह, आम जनता, त्यसले केही नपाउने गुनासो समेत गरे ।

‘प्रधानमन्त्री जी त परमादेशले बनेको हो । जनताको आदेशले होइन, जनताद्धारा होइन, आदेशले नै बनेको हो,’ अध्यक्ष ठाकुरले भने, ‘यो संविधानको जतिसुकै गुण गाउनुस् तर यो संविधानले गर्दा हामीले गोली खानु परेको छ, सहिद हुनु परेको छ । अहिले पनि हाम्रा साथीहरु जेलमा यातना भोगिरहेका छन् । हाम्रो संसद जेलमा छ । रेशम चौधरी जेलमा छ ।’

उनले पूर्वप्रधानमन्त्री केपी शर्मा ओलीले आफूहरुको मुद्दालाई सम्बोधन गर्दै धन्यवाद दिए । ‘उहाँले नागरिकता सम्बन्धी अध्यादेश पनि ल्याउनु भयो । १३९ जनामाथि यो मुद्दाहरु तथा सजाय थियो त्यो उहाँहरुले फिर्ता लिनुभयो । ’

उनले नागरिकता समबन्धी अध्यादेशमा अवरोध भएको भन्दै नागरिकता दिने अधिकार राज्यको भएकोले जोसँग नागरिकता छैन उसको राष्ट्रियता के भनेर प्रश्न समेत गरेका थिए ।