हामी सबैकाे संसारन्यूज

३ साउन, काठमाडौँ । प्रतिनिधि सभाको दोस्रो बैठकमा प्रधानमन्त्री शेरबहादुर देउवाले विश्वासको मतको प्रस्ताव राखेका छन्। सर्वोच्च अदालतबाट पुनर्स्थापित प्रतिनिधि सभाको पहिलो बैठकबाटै विश्वासको मत लिन लागेका देउवाको पक्षमा स्पष्ट बहुमत देखिएको छ ।

जनता समाजवादी पार्टी(जसपा)को महन्थ ठाकुर पक्षले प्रधानमन्त्री शेरबहादुर देउवालाई विश्वासको मत दिने निर्णय गरेसँगै एमालेको माधव समूहका कुनै सांसद्ले मत नदिएपनि देउवाको पक्षमा बहुमत पुग्ने भएको हो । जसपा अध्यक्ष ठाकुरले संसदमा बोल्दै आफूहरुले विश्वासको पक्षमा मतदान गर्ने उद्घोष गरेका छन् ।

यससँगै देउवाको पक्षमा कांग्रेसको ६१, माओवादी केन्द्रको ४९, राष्ट्रिय जनमोर्चाको १, जसपा उपेन्द्र समूहको ३२ गरी देउवाको पक्षमा १ सय ४३ मत सुनिश्चित भएको छ । विश्वासको मतका लागि १ सय ३६ मत आवश्यक पर्छ ।

विपक्षी गठबन्धनमा रहेर देउवालाई प्रधानमन्त्री बन्न सहयोग गरेको नेकपा एमालेका वरिष्ठ नेता माधवकुमार नेपाल पक्षले सामूहिक निर्णय गर्न सकेको छैन, यद्यपी केही सांसदहरुले देउवाको पक्षमा मत दिने बताइरहेका छन् ।