Sansar News
साउन ४, काठमाडौं । नेकपा (एमाले)को केन्द्रीय कमिटीको बैठक ललितपुरस्थित तुलसीलाल स्मृति प्रतिष्ठानमा केहीबेरदेखि जारी छ । जेठ २ अघिको संरचनाअनुसार १० औं बैठक भनि बोलाइएको बैठकमा पनि माधवकुमार नेपाल पक्ष भने उपस्थित छैन् ।
१० बुँदे सम्झौतापश्चात बोलाइएको बैठकलाई माधव पक्षले एकलौटी भन्दै उपस्थित हुन अस्वीकार गरेको छ ।
जारी बैठकमा पार्टीको विधान र आगामी महाधिवेशनबारे छलफल हुने एजेण्डा तय भएको एमाले केन्द्रीय कार्यालयका सचिव शेरबहादुर तामाङले जानकारी दिए । बैठकमा प्रधानमन्त्री शेरबहादुर देउवालाई विश्वासको मत दिने नेताहरुको बारेमा पनि छलफल हुने जनाइएको छ ।
माधव नेपालसहित एमालेका २२ जना सांसदले देउवालाई मत दिएका थिए । जसमा पार्टी अध्यक्ष केपी शर्मा ओली पक्षकै ९ जना सांसद पनि सहभागी थिए । एमालेका २२ सांसदले मत दिएसँगै देउवाले १६५ सांसदको मत पाएका थिए ।
वि.सं.२०७८ साउन ४ सोमवार १३:१५ मा प्रकाशित
