हामी सबैकाे संसारन्यूज

साउन ४, काठमाडौं । नेकपा (एमाले)का सांसद कृष्णकुमार श्रेष्ठ (किसान)ले पार्टी अध्यक्ष केपी शर्मा ओली नेतृत्वको समूहमा ठूलो पहिरो जाँदै गरेको बताएका छन् । उनका अनुसार ओलीको शैली र व्यवहारका कारण निकै ठूलो असन्तुष्टी चुलिएको छ । असन्तुष्ट नेताहरु विद्रोहको तयारीमा रहेको उनले बताए ।

एक सञ्चार माध्यमसँग कुराकानी गर्दै उनले भनेका छन्, ‘त्यहाँ भित्र (ओली समूह) पिल्सिएका, अन्यायमा परेका असन्तुष्ट धेरै साथीहरु हुनुहुन्छ, मलाई विश्वास छ धेरै साथीहरु आउनुहुन्छ। त्यहाँ धेरै असन्तुष्टि छ। विद्रोह हुने सम्भावना छ।’

श्रेष्ठले संसद जोगाउनकै लागि आफुँ ओलीले गरेको निर्देशनका विपक्षमा लागेको बताएका छन् । उनले ओलीले पटक–पटक संसद विघटन गर्दै देशलाई संकटमा पु¥याएको बताए ।

प्रधानमन्त्री शेरबहादुर देउवाले विश्वासको मत लिन राखेको प्रस्तावमा श्रेष्ठसहित ओली पक्षमा ९ सांसदले पार्टी निर्देशन विपरित मत हालेका थिए । उनीहरुले ओलीको निर्देशन गलत भएको भन्दै कारबाही गरे भोग्न तयार रहेको पनि बताएका छन् ।

सांसद श्रेष्ठ ओलीका निकै विश्वास पात्रको रुपमा चिनिएका थिए । तत्कालिन सांसद अपहरण काण्डमा समेत नाम मुछिएका उनले गरेको विद्रोहलाई अर्थपूर्णं रुपमा हेरिएको छ ।