Sansar News
साउन ८, काठमाडौं । कम्युनिष्ट खेमाका शीर्ष नेताहरु आज एउटै मञ्चमा देखिने भएका छन् । पुष्पलाल मित्रता केन्द्रको आयोजनामा शुक्रबार तुलसीलाल स्मृति प्रष्तिठानको भवनमा हुन लागेको कार्यक्रममा विभिन्न ६ वटा कम्युनिष्ट पार्टीका शीर्ष नेताहरु देखिन लागेका हुन् ।
कार्यक्रम आयोजकले बताएअनुसार नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’, नेकपा एमाले वरिष्ठ नेता माधवकुमार नेपाल, नेकपा क्रान्तिकारी माओवादीका महासचिव मोहन वैद्य, नेकपाका महासचिव नेत्रविक्रम चन्द ‘विप्लव’ र राष्ट्रिय जनमोर्चाका अध्यक्ष चित्रबहादुर केसी र चन्द्रदेव जोशीसहित ६ जना कम्युनिस्ट नेताहरुले कार्यक्रमलाई सम्बोधन गर्नेछन् ।
कार्यक्रममा नेकपा (एमाले)का अध्यक्ष केपी शर्मा ओलीलाई भने बोलाइएको छैन् । ओली कम्युनिष्ट आन्दोलन र दर्शनबाट विचलन भएको निष्कर्ष निकाल्दै आयोजकले नबोलाएको हो ।
माओवादी केन्द्र र एमालेको माधवकुमार नेपाल पक्षसहित बृहत कम्युनिष्ट एकताको चर्चा चलिरहेको बेला नेताहरुलाई एक ठाउँमा जुट्नुलाई अर्थपूर्णं रुपमा हेरिएको छ ।
वि.सं.२०७८ साउन ८ शुक्रवार १२:४१ मा प्रकाशित
