हामी सबैकाे संसारन्यूज

साउन ८, काठमाडौं । प्रधानमन्त्री शेरबहादुर देउवाले ऋण खोजेरै भएपनि सबै नेपालीलाई कोरोनाविरुद्व खोप लगाउने प्रतिबद्धता जनाएका छन् । शुक्रबार प्रतिनिधि सभामा आफ्नो पक्षमा विश्वासको मत दिने दल तथा सांसदहरुलाई धन्यवाद ज्ञापन गर्दै उनले यस्तो प्रतिबद्धता जनाएका हुन् ।

‘खोपको कुरा हाम्रो प्राथमिकता हो, ऋण लगाएर, सापट मागेर भएपनि, जहाँ–जहाँबाट पाइन्छ, जति महंगो भएपनि हामीले किनेर नेपाली जनतालाई पुर्याउने प्रतिबद्धता गरेका छौं’, देउवाले भनेका छन्, ‘जसरी पनि पुर्याउने हामी विश्वास दिलाउन चाहन्छौं ।’

उनले विपक्षी एमालेलाई सरकारको विरोधभन्दा सरकारका काममा सहयोग गर्न आग्रह गरे । देउवाले बाँकी समयमा देखिने गरि काम गर्ने विश्वास दिलाए । देउवाले आफुँलाई निकै अनुभवि नेताहरुको साथ रहेको भन्दै काम गर्न सकिने विश्वास देखाए ।

‘के कार्यकाल चल्ला खै यो वर्ष भन्ने प्रश्न छ, यो कार्यकालमा हामी मिलेर केहि न केहि दिर्घकालिन रुपमा देखिने केहि काम गर्न चाहन्छौं, म प्रतिबद्धता व्यक्त गर्छु केहि गरेरै देखाउँछौं’ देउवाले भने, ‘हाम्रो यो संयुक्त सरकार छ, यसमा एक सय एक अनुभवी नेताहरु हुनुहुन्छ, पुष्पकमल दाहाल जी हुनुहुन्छ, जसपाका उपेन्द्र जीलगायत नेता हुनुहुन्छ, सबै साथीहरुको समर्थन प्राप्त भएको छ ।’