Sansar News
१९ साउन, काठमाडौँ । सरकारले शिक्षक सेवा आयोगको अध्यक्षमा मधुप्रसाद रेग्मीलाई नियुक्त गरेको छ । प्रधानमन्त्रीको सरकारी निवास बालुवाटारमा मंगलबार बसेको मन्त्रिपरिषद बैठकले रेग्मीलाई आयोगको अध्यक्ष बनाएको हो ।
शिक्षकहरुको नियुक्ति एवं वृत्ति विकासमा भूमिका खेल्ने यस आयोगका सदस्यहरुमा डा. डिल्लीराम रिमाल र नन्दकुमारी महर्जनलाई नियुक्त गरिएको सरकारका प्रवक्ता एवं मन्त्री ज्ञानेन्द्रबहादुर कार्कीले जानकारी दिए । आयोगका अध्यक्ष ताना गौतमको कार्यकाल गत असोज १४ गतेदेखि सकिएपछि आयोग पदाधिकारीविहीन बनेको थियो ।
०४१ सालमा गृह मन्त्रालयमा नायव सुब्बाबाट शुरु भएको रेग्मीको निजामती यात्रा ०४३ सालमा प्रशासन सेवामा अधिकृत भए पनि न्याय सेवाबाटै उनी ०४९ सालमा उपसचिव हुँदै ०६१ मा सहसचिव भएका थिए । लोक सेवा आयोगको सचिवबाट २०७४ कात्तिक ६ गते शिक्षा मन्त्रालयको सचिवमा सरुवा भएका थिए । २०७४ चैत २३ गते शिक्षाबाट सार्वजनिक खरिद अनुगमन कार्यालयमा सरुवा भएपछि अवकास भएका हुन् । ०७० साल फागुन २९ गते सचिवमा बढुवा भएका रेग्मीले उपसचिव हुँदा शिक्षा मन्त्रालयको कानून शाखामा काम गरेका थिए ।
कानूनका जानकार मानिने रेग्मीले बेलायतबाट कानूनमा स्नातकोत्तर गरेका छन् । जन प्रशासनमा समेत स्नातकोत्तर गरेका रेग्मीको निजामती सेवामा अधिकाँश समय कानूनमै वितेको छ ।
गतवर्ष पुषमै आयोगमा पदाधिकारी छनौट गर्न गठित सर्च कमिटिले उनीहरुको नाम सिफारिस गरेको थियो । व्यवसायिक कार्ययोजनाको प्रस्तुतीकरण तथा अन्तरवार्ताबाट छनौटमा परे पनि मन्त्री परिषद्बबाट निर्णय हुन नसक्दा उनीहरुकाे नियुक्ति रोकिएको थियो ।
एक अध्यक्ष र दुई जना सदस्य (एक महिला अनिवार्य) गरी ३ सदस्यीय शिक्षक सेवा आयोग गठन हुने प्रावधान शिक्षा ऐनमा छ ।पदाधिकारीहरुको नियुक्ति ५ वर्षको लागि हुन्छ । शिक्षा ऐनमा शिक्षक सेवा आयोगको अध्यक्ष र सदस्य पदमा पुनः नियुक्ति हुने व्यवस्था छ ।
वि.सं.२०७८ साउन १९ मंगलवार २०:४१ मा प्रकाशित
