Sansar News
साउन ३२, काठमाडौं । काबुलस्थित दूतावासबाट अमेरिकाले आफ्नो झण्डा हटाएको छ । अमेरिकी विदेश मन्त्रालयका एक कर्मचारीले रोयर्टसलाई बताएअनुसार माथिल्लो तहका अधिकारीको निर्देशनपछि झण्डा हटाइएको हो ।
अहिले सबै कर्मचारीहरुलाई स्वदेश फिर्ताको लागि एयरपोर्ट पुर्याएको रोयर्टसले जनाएको छ । यसैबीच आफ्नो नागरिकलाई सुरक्षित अमेरिका फिर्ता लैजान अमेरिकी राष्ट्रपतिले थप एक हजार सैनिकलाई अफगानिस्तान पठाउने निर्णय गरेका छन् । जससँगै अफगानिस्तामा अमेरिकी सैनिक ६ हजार हुनेछन् ।
दूतावासबाट अमेरिकी झण्डा हटाइएसँगै र उसले समर्थन गरेको राष्ट्रपति अशरफ गनी देश छोडेर भागेसँगै राष्ट्रपति जो बाइडेनमाथि गम्भीर सवाल उठेको छ । यसलाई अमेरिकाको हारको रुपमा पनि व्याख्या गरिन थालेको छ ।
केहि दिन अमेरिकी सेना अफगानिस्तामै रहने
अमेरिकाले आफ्ना ६ हजार सैनिकलाई भने आज नै फिर्ता नगर्ने भएको छ । रोयर्टसले जनाएअनुसार ६ हजार सैनिकले केहि समय अफगानिस्तानमा हवाई ट्राफिक कन्ट्रोलको काम सम्हाल्नेछन् ।
उसले आफ्ना सबै नागरिकलाई फिर्ता नगरुन्जेल सेनालाई फिर्ता गराउने छैन् । हाल अफगानिस्तानमा हजारौं संख्यामा अमेरिकी नागरिक रहेका छन् । साथै उसका समर्थक र कर्मचारी पनि छन् ।
अमेरिकाले आफ्ना नागरिकसँगै समर्थकलाई पनि सुरक्षित अमेरिका लैजाने तयारी गरेको छ । जनाइएअनुसार अमेरिकी समर्थन प्राप्त सरकारलाई सहयोग गर्ने २ हजार अफगानी नागरिकलाई पनि उसले अमेरिका लैजाने छ ।
२ हजार अफगानी नागरिकमा राजनीतिक नेता, कर्मचारी, सुरक्षाकर्मीलगायत रहेको बताईएको छ ।
वि.सं.२०७८ साउन ३२ सोमवार १३:४० मा प्रकाशित
