हामी सबैकाे संसारन्यूज

भदौ ९, काठमाडौं । माधवकुमार नेपाल नेतृत्वको प्रस्तावित नेकपा (एकीकृत समाजवादी)को दल दर्ताको सनाखत सकिएको छ । आयोगले दिएको समयसीमा भित्रै नेपाल पक्षका सांसद तथा केन्द्रीय सदस्यहरु उपस्थित भएर सनाखत गरेका हुन् ।

साबिक नेकपा (एमाले)का ३० सांसद र ५५ जना केन्द्रीय सदस्यले एकीकृत समाजवादीको पक्षमा सनाखत गरेको नेतृ निरादेवी जैरुले जानकारी दिइन् । पछि थपिएका ४ सांसदको विषयमा पनि आयोगले सहमति दिएको उनले बताइन् । यसअघि पछि थपिएका ४ सांसदले दलको पक्षमा सनाखत गर्न नमिल्ने भन्दै आयोगले अलमल गरेको थियो ।

एकीकृत समाजवादीको पक्षमा झलनाथ खनालले दिल्लीबाटै हस्ताक्षर पठाएका थिए भने प्रदीप नेपाल निर्वाचन आयोग पुगेरै हस्ताक्षर गरेका थिए ।

यसअघि दल दर्ताका लागि निवेदन दिँदा एमालेका २०३ सदस्यीय कमिटीका ५७ जनाले हस्ताक्षर गरेका थिए ।

राजनीतिक दलसम्बन्धी अध्यादेशअनुसार दल विभाजनका लागि संसदीय दल वा केन्द्रीय समितिमा २० प्रतिशतको समर्थन चाहिन्छ । सो व्यवस्थाअनुसार दाबी गरिएबमोजिम माधव नेपाल नेतृत्वको पार्टीमा दुवै तर्फ २० प्रतिशत पुगेको छ । नेतृ जेरुका अनुसार आयोगले आज नै दल दर्ताको प्रमाणपत्र दिने तयारी गरेको छ ।