Sansar News
१० भदौ, काठमाडौँ । नवगठित नेकपा(एकीकृत समाजवादी)का नेता राजेन्द्र राईले प्रदेश १ को सरकार ढल्ने बताएका छन् ।
धेरैले यसबारेमा प्रश्न गर्ने गरेको बताउँदै नेता राईले सामाजिक सञ्जालमार्फत एकमुष्ट जवाफ भनेर यस्तो बताएका हुन् । प्रदेश १ का ४ जना सांसद एकीकृत समाजवादीको पक्षमा रहेकाले एमालेको हालको सरकार ढल्ने स्पष्ट पारेका छन् ।
नेकपा(एकीकृत समाजवादी)ले दल दर्ताको औपचारिक प्रमाणपत्र पाएपछि सामाजिक सञ्जालमा स्टाटस लेख्दै नेता राईले लेखेका छन् ‘जवाफ कतिलाई दिनु, यही हेरी बुझ्नु : प्रदेस एकमा ४ जना सांसद नेकपा (एकीकृत समाजवादी) पक्षमा उभिए एमालेको हालको सरकार ढल्छ ।’
एमाले विभाजनसँगै प्रदेश १ का मुख्यमन्त्री शेरधन राई अल्पमतमा परेका छन् । राजेन्द्र राईलाई मुख्यमन्त्री बनाउन एकीकृत समाजवादीका अध्यक्ष माधव नेपालले गठबन्धनमा रहेका अन्य दलहरुलाई सहमत गराईसकेका छन् । अब केहि दिनभित्रै राईका विरुद्ध अविश्वासको प्रस्ताव दर्ता हुने बताइएकाे छ।
यसअघि नेपाल समूहबाट मुख्यमन्त्रीका लागि संसदीय दलको चुनाव समेत लडेका भिम आचार्यले अन्तिम समयमा आएर नेपालको साथ छाडेपछि नेता राईका लागि मुख्यमन्त्री बन्ने बाटो खुलेको हो ।
बुधबार निर्वाचन आयोगबाट नेकपा (एकीकृत समाजवादी)ले दल दर्ताको प्रमाणपत्र पाएको छ ।
वि.सं.२०७८ भदौ १० बिहीवार ०८:४३ मा प्रकाशित
