Sansar News
भदौ १०, काठमाडौं । नेकपा (एकीकृत समाजवादी)का अध्यक्ष माधवकुमार नेपालले अन्तिम समय छाडेर एमालेमा फर्किने नेताहरुप्रति गुनासो नरहेको बताएका छन् । निर्वाचन आयोगबाट नयाँ पार्टीको मान्यता पाइसकेपछि बिहीबार पत्रकार सम्मेलन गर्दै उनले यस्तो बताएका हुन् ।
‘क्रान्तिकारीहरु कहिल्यै थाक्दैनन् तर थाक्नेहरु थाकिरहन्छन्, त्यस्ताहरुप्रति मेरो कुनै गुनासो छैन्’ माधव नेपालले भनेका छन्, ‘आज सहयोद्धामध्ये कतिपय मेरो साथमा हुनुहुन्न, यस्तो हुनेगर्दछ, ३२ सालका कतिपय सदयोद्धाहरु साथमा छैनन्। माले कालका कतिपय सहयोद्धाहरु छैनन्। एमालेकालका कतिपय सहयोद्धाहरु छैनन्।’
नेता नेपालले आफुँले क्रान्तिकारी पार्टी बनाउने अठोट गरेको भन्दै छाड्नेप्रति पछाडि नर्फकने बताए । केपी शर्मा ओलीको कब्जामा रहेको पार्टीबाट निकास पाएको उनको भनाई छ ।
नेपालले ओलीको गुटबाट छुटकारा लिन सबै नेता तथा कार्यकर्तालाई अपिल पनि गरेका छन् । उनले परिवर्तनको लागि पनि ओलीबाट अलग हुनुपर्ने बताए ।
‘केपी ओली गुटबाट तत्काल छुटकारा पाउनुस्, दक्षिणपन्थी भासमा फसेको, जनताको जिम्मेवारीबाट भागेको, पार्टी तहसनहस गर्न उद्धत भएको, सरकार सञ्चालन गर्न असफल, पार्टी विभाजित हुँदा भोजभतेर गरेर खुसी मनाएको, एकै कार्यकालमा दुई पटक प्रतिनिधि सभा विघटन गर्नेलाई साथ नदिनुस्,’ नेपालले भने, ‘देशभर पीडित रहनुभएका साथीहरू नयाँ क्रान्तिकारी धारमा समाहित हुनुस्।’
वि.सं.२०७८ भदौ १० बिहीवार १६:३१ मा प्रकाशित
