हामी सबैकाे संसारन्यूज

११ भदौ, दैलेख । एम्बुलेन्स नपाउँदा एक नवजात शिशुको मृत्यु भएको छ । गाउँपालिकाले उधारोमा एम्बुलेन्स दिन नमान्दा शिशुको मृत्यु भएको हो ।

दैलेखको ठाँटीकाँध गाउँपालिका—५ की मञ्जु विकको नवजात शिशुको उपचारका लागि लैजाँदा लैजाँदै बाटोमै मृत्यु भएको हो । निमोनियाले थलिएकी शिशुलाई प्राथमिक केन्द्रले प्रदेश अस्पताल सुर्खेत रिफर गरेको थियो ।

शिशुलाई थप उपचारका लागि सुर्खेत लैजान एम्बुलेन्स उधारोमा माग्दा गाउँपालिकाका अध्यक्ष धिरबहादुर शाहीले नदिँदा शिशुको मृत्यु भएको पीडित परिवारको आरोप छ ।

बिहानैदेखि स्वास्थ्यकर्मीले प्रयत्न गर्दा पनि निको नहुने देखेपछि मंगलबार दिउसो दुई बजेतिर प्रदेश अस्पताल लैजान रिफर गरेलगतै गाउँपालिकाका अध्यक्षलाई अनुरोध गरेको थियो ।

अध्यक्ष शाहीले भाडा नतिरेसम्म एम्बुलेन्स नदिने भन्दै ढिलाई गरेका कारण शिशुको मृत्यु भएको पीडित परिवारको भनाइ छ । प्रहरीको पहलमा बिरामी शिशुलाई मंगलबार राति दश बजे उधारोमै एम्बुलेन्समा पठाएपनि अस्पताल नपुग्दै बीच बाटोमै मृत्यु भएको मृतककी आमाले बदताएकी छन् ।

यसबारेमा संसार न्यूजसँग कुराकानी गर्दै सो गाउँपालिकाका अध्यक्ष धीरबहादुर शाहीले एम्बुलेन्स चालकले अगाडिको भाडा नतिरेको र पछिल्लो पटक पनि उधारो मागेको भन्दै चालकले सेवा दिन अस्वीकार गरेको बताएका छन् । यसअघि उनले गर्भवती र सुत्केरीका लागि मात्र निःशुल्क सेवा दिएकोले अन्य बिरामीलाई निःशुल्क दिन नसक्ने बताएका थिए ।