हामी सबैकाे संसारन्यूज

१३ भदौ, काठमाडौं । बुटवल महानगरपालिकाको ज्योतिनगरमा आइतवार बिहान पहिरो जाँदा झण्डै एकदजर्न घरमा क्षति पुगेको छ ।

जिल्ला प्रहरी कार्यालय बृुटवलका अनुसार बिहान ६ बजे खसेको पहिरोका कारण तीन घरमा पूर्णरुपमा क्षति भएको र अन्य घर समेत जोखिममा रहेका छन् ।

बिहानको समयमा पहिरो खसेकोले मानविय क्षति भने नभएको प्रहरीले जनाएको छ । साथै पहिरोका कारण बुटवलको गोलपार्कदेखि लक्ष्मीनगर जाने बाटोमा पनि क्षति पुगेको छ । त्यहाँ बाटो अवरुद्ध हुनुका साथै बिजुलीको पोलहरु ढलेका छन् ।

पहिरोको जोखिममा रहेका अन्य स्थानीयलाई अन्यत्र सार्ने तयारी भइरहेको प्रहरीले जनाएको छ । सोहि ठाउँमा यसअघि २०५५ साल भदौमा पनि पहिरो खसेर ५ दर्जन घरमा क्षति पुगेको थियो ।

मौसम पूर्वानुमान माहाशाखाले आज पनि लुम्बिनी प्रदेशका विभिन्न स्थानमा मेघ गर्जन÷चट्याङ्ग सहित भारी वर्षा हुने भएकाले सतर्कता अपनाउन अनुरोध गरेको छ ।