हामी सबैकाे संसारन्यूज

भदौ १५, काठमाडौं । सनाखत हुने समयसम्मका लागि भनेर बेग्लै होटेलमा बसेका माधवकुमार नेपाल पक्षीय प्रदेश १ का सांसदहरु अन्तिम समयमा भने होटेल छाडेर हिँडेका छन् । समाजवादीका १० सांसदहरुमा सोमबार बेलुकादेखि होटेलबाट बाहिरिएका हुन् ।

माधव पक्षका नेता एवं प्रदेश सांसद राजेन्द्र राईले आफुँहरु होटेलबाट बाहिरिएको जानकारी दिए । होटेलमा बसेको विषयमा एमाले पक्षका नेताहरुले अनावश्यक विवाद निकाले पछि बाहिरिएको उनले बताए ।

सांसदहरुबीच बुधबार प्रदेश निर्वाचन कार्यालयमा भेट हुने सहमति भएको उनले जनाए । यसअघि मंगलबार नै सनाखतका लागि आयोग जाने भन्दै माधव पक्षमा देखिएका १० सांसदहरु बेग्लै होटेलमा बसेका थिए ।

राजेन्द्रकुमार राईको नेतृत्वमा खिनु लङ्बा, सावित्रीकुमारी रेग्मी, राजन राई, कृष्णकुमारी राई, गणेशकुमार काम्बाङ, सुनिताकुमारी चौधरी, सरिता थापा, उपेन्द्र घिमिरे र पदमकुमारी गुरुङ सामूहिक रुपमा होटेलमा बसेका थिए ।

मंगलबार सनाखतका लागि जाने तयारीमा रहेका उनीहरु बुधबार मात्रै जाने निर्णयमा पुग्नु र अन्तिम समय होटेल छाड्नुले प्रश्न उब्जाएको छ । प्रदेश १ मा एमाले विभाजनसँगै भीम आचार्य नेतृत्वको सरकार पनि संकटमा पुगेको देखिन्छ । यदि माधव नेतृत्वको पार्टी १० सांसदले सनाखत गरेमा एमाले सरकार स्वतः ढल्नेछ ।