Sansar News
भदौ १६, काठमाडौं । वागमती प्रदेशका सामाजिक विकास मन्त्री कृष्ण खनालले १५ दिन नपुग्दै पदबाट राजीनामा दिएका छन् । अष्टलक्ष्मी शाक्य मुख्यमन्त्री बनेपछि सोही दिन मन्त्रीमा नियुक्त भएका खनालले नेकपा एमाले छाडेको भोलिपल्टै राजीनामा दिएका हुन् ।
खनालले बुधवारमात्रै प्रदेश निर्वाचन कार्यालय हेटौंडा पुगेर नेकपा एसको पक्षमा सनाखत गरेका थिए । उनीसहित १२ सांसदले एमाले छाडेपछि सरकार अल्पमतमा परेको छ ।
चितवनबाट निर्वाचित खनाल नेकपा एमालेको केन्द्रीय सदस्य समेत थिए । अब वागमती सरकारमा मुख्यमन्त्री र आन्तरिक मामिलामन्त्री केशव पाण्डे छन् । एमाले विभाजनसँगै सरकार अल्पमतमा परेको छ ।
वि.सं.२०७८ भदौ १६ बुधवार ११:४४ मा प्रकाशित
