Sansar News
भदौ २४, स्याङ्जा । नेकपा (एमाले) स्याङ्जाको अध्यक्षमा सुर्यप्रसाद गैरे (पारस) नियुक्ति भएका छन् ।
एमाले माओवादी एकता हुँदा माओवादीको तर्फबाट गैरे जिल्ला अध्यक्ष बनेका थिए । तत्कालिन नेकपाको विघट्न र पुनः नेकपा(एमाले)को निर्माणसँगै पार्टीले गैरेलाई अध्यक्षको जिम्मेवारीमा निरन्तरता दियो । नेकपा(एमाले) भित्रको आन्तरिक सहमतिअनुसार पार्टी ०७५ जेठ २ गतेको अवस्थामा फर्किएपनि एमालेले माओवादी विरासत भएका गैरेलाई जिल्ला अध्यक्षमा निरन्तरता दिने निर्णय दोहोर्याएको हो ।
एमालेको तत्कालिन अवस्थामा पार्टी अध्यक्षको जिम्मेवारी सम्हालेका मिनप्रसाद गुरुङलाई पार्टीले माथिल्लो तहको जिम्मेवारी दिने निर्णय गरेको छ ।
नेकपा(समाजवादी)मा जानेलाई पार्टीको माइन्युटबाट हटाइयो
नेकपा(एमाले) परित्याग गरि नवगठित नेकपा(समाजवादी)मा जाने पार्टी नेता तथा कार्यकर्ता र जनप्रतिनिधिहरुको नाम पार्टीले आफ्नो आदिकारिक माइन्युटबाट हटाएको छ । भदौ २३ गते बसेको जिल्ला कमिटि बैठकले सो निर्णय गरेको एमाले स्याङ्जाका अध्यक्ष गैरेले संसारन्युजलाई बताए ।
पार्टीको बैठकले भदौ २७ मा पालिका स्तरिय कमिटिको बैठक, भदौ ३० गते जिल्ला भेला, असोज २ गतेदेखि ११ गतेसम्म पालिका स्तरिय कमिटिको भेला र असोज मसान्तसम्म वार्ड स्तरीय भेला गर्ने निर्णय गरेको छ । त्यस्तै पार्टी सदस्यताको नविकरण असोज १५ सम्म गरिसक्ने निर्णय भएको अध्यक्ष गैरेले बताए ।
वि.सं.२०७८ भदौ २४ बिहीवार १४:२९ मा प्रकाशित
