हामी सबैकाे संसारन्यूज

भदौ २४, काठमाडौं । नेकपा (एमाले)का अध्यक्ष केपी शर्मा ओलीले अमेरिकी सहयोग परियोजना मिलेनियम च्यालेन्ज कर्पोरेसन ९एमसीसी०की उपाध्यक्ष फतिमा सुमारलाई एमसीसी सम्झौताबारे सत्तारुढ पक्षले धारणा ल्याएपछि मात्रै आफुँहरुले धारणा राख्ने बताएका छन् । बिहीबार एमसीसी उपाध्यक्ष सुमार सम्झौताको बारेमा राखेको जिज्ञासामा उनले यस्तो बताएका हुन् ।

सरकारमा हुँदा आफुँहरुले एमसीसीबारे प्रष्ट धारणा राखेको भन्दै अहिले सत्तारुढको भूमिका मुख्य हुने कुरा सुमारलाई बताएको एमाले विदेश विभाग प्रमुख राजन भट्टराईले जानकारी दिए । ‘विगतमा हामी सरकारमा भएका बेला प्रयास गरेका हौं, केही साथीहरुको भूमिका कारण पारित गर्न सकिएन, अहिले हामी सरकारमा छैनौं’ ओलीको भनाइ उधृत गर्दै भट्टराईले भने ‘पहिले सरकारको धारणा आओस् ।’

हालसम्म सत्ता गठवन्धनले एमसीसीबारे कुनै पनि छलफल नगरेको भन्दै ओलीले सत्ता गठवन्धनसँग बहुमत भएकाले उनीहरुले छलफल नै नगरेकाले अहिले प्रष्ट हुन आवश्यक नभएको जवाफ दिएका थिए।

‘हामीले हतारिएर पोजिसन बनाउन आवश्यक छैन भनेर भनेका छौं। पहिले सरकारमा रहेकाहरुले पोजिसन क्लियर गर्नुपर्छ अनि प्रतिपक्षले’, भट्टराईले भने।