हामी सबैकाे संसारन्यूज

भदौ २५, काठमाडौं । नेपाल विद्युत प्राधिकरणका कार्यकारी निर्देशक कुलमान घिसिङविरुद्ध निर्वतमान कार्यकारी निर्देशक हितेन्द्रदेव शाक्यले दायर गरेको रिटको सुनुवाइ आज हुने भएको छ। प्रधानन्यायाधीश चोलेन्द्र शमशेर राणाले आफैंले सुनुवाई गर्नेगरी सो रिटको पेशी तोकेका छन् ।

यसअघि भदौ ८ गते प्रधानन्यायाधीशकै इजलासमा भएको सुनुवाइमा कुलमानलाई नियुक्ति गर्दाको मिसिल झिकाउने आदेश गरेको थियो। त्यस्तै शाक्यलाई विद्युत विकास निगममा लैजान गरिएको निर्णयको प्रति पनि झिकाउने आदेश गरेको थियो।

आफूलाई हटाएर घिसिङलाई नियुक्त गर्ने सरकारी निर्णयलाई चुनौती दिँदै शाक्य गत साउन ३२ मा अदालत पुगेका हुन्। कार्यकारी निर्देशक पदमा ‘थमौती गरिपाँउ’ र घिसिङको नियुक्ती ‘बदर गरिपाँउ’ भन्ने माग शाक्यले राखेका छन् ।

सरकारले आफ्नो स्थानमा कुलमानलाई नियुक्त गर्नु गैरकानुनी भएको उनको जिकिर छ। शाक्यले आफ्नो नियुक्ति चार वर्षका लागि भएको भन्दै सरकारले बिचमै हटाउन नसक्ने र आफूलाई अन्यत्र पद सिर्जना गरी नियुक्त गर्न नमिल्ने जिकिर रिटमा गरेका छन्।

शाक्यले मन्त्रिपरिषद्को कार्यालय र प्राधिकरणमा नवनियुक्त कार्यकारी निर्देशक घिसिङलगायतलाई विपक्षी बनाएका छन् ।