हामी सबैकाे संसारन्यूज

भदौ २९, काठमाडौं । नेकपा (एमाले)ले माधवकुमार नेपालसहित १४ सांसदमाथि गरेको कारबाहीको सूचना टाँस नगरेसम्म संसद चल्न नदिने भएको छ । एमालेले मंगलबारका लागि बोलाइएको संसद बैठकमा पनि अवरोध गर्ने तयारी गरेको छ ।

सांसद खगराज अधिकारीका अनुसार सभामुख अग्निप्रसाद सापकोटाले एमालेले कारबाही गरेका सांसदलाई पदमुक्त गरेको सूचना निःशर्त टाँस्नुपर्छ । संसदलाई सहज रुपमा सञ्चालन गर्न आफुँहरु इच्छुक रहेको भन्दै उनले सभामुखले नियमअनुसारका काम नगरेसम्म आफुँहरुले विरोध जारी राख्ने बताए ।

‘हामी सहज रुपमा बैठक चलोस् भन्ने चाहन्छौं, एमालेले संसद बैठक सञ्चालन हुन नदिन अवरोध गर्यो भन्ने भ्रम फैलाइएको छ’, अधिकारीले भनेका छन्, ‘सभामुख सापकोटाले नियमअनुसार कारबाही गर्नुभएन, उहाँहरु नै संसद सञ्चालनमा इच्छुक देखिनुहुन्न, उहाँले नियमअनुसार काम नगरेपछि विरोध गर्नु हाम्रो दायित्व हो ।’

उनका अनुसार सभामुख सापकोटाले आफुँलाई सच्याएर नियमअनुसार सूचना टाँस नगरेसम्म एमालेले विरोध कायम राख्नेछ । त्यो निर्विकल्प भएको पनि उनले बताए ।

गत बुधबारदेखि सुरु भएको प्रतिनिधिसभाको नवौं अधिवेशन प्रमुख प्रतिपक्षी दल नेकपा (एमाले)को निरन्तर अवरोधका कारण सञ्चालन हुन सकेको छैन् । संसद बैठक निरन्तर अवरोध भएसँगै सोमबार सभामुखले सर्वदलीय बैठक बोलाएका थिए । तर, एमालेकै अनुपस्थितिका कारण सोमबार बसेको सर्वदलीय बैठक निष्कर्ष बिहिन बन्न पुगेको थियो ।